QR Premer-Ministri Álihan Smaiylov «Qazaqstan-Eýroodaq» dialog platformasynyń otyrysyn ótkizdi, dep habarlaidy "Ult aqparat" Úkimettiń baspasóz qyzmetine silteme jasap.
Sharaǵa Eýropalyq odaqtyń Qazaqstandaǵy ókildiginiń basshysy, Germaniia, Frantsiia, Ispaniia, Litva, Polsha, Belgiia, Shvetsiia, Slovakiia, Estoniia, Horvatiia, Niderland, Bolgariia, Chehiia, Latviia, Finliandiia, Italiia, Aýstriia, Grekiia jáne Rýmyniianyń elimizdegi elshileri, sondai-aq ortalyq memlekettik organdar men ulttyq kompaniialardyń basshylary qatysty.
Otyrys basynda QR Premer-Ministri Eýropalyq Odaq kóp jyldar boiy Qazaqstannyń negizgi saiasi, saýda-ekonomikalyq jáne investitsiialyq seriktesteriniń biri ekenin atap ótti.
Máselen, Qazaqstan men EO elderi arasyndaǵy taýar ainalymy 2022 jyldyń 6 aiynda $20,1 mlrd qurady. Bul 2021 jyldyń sáikes kezeńimen salystyrǵanda 51,2%-ǵa kóp.
1-toqsannyń qorytyndysy boiynsha jalpy sheteldik investitsiialardyń elge kelýi 54%-ǵa artyp, $6,8 mlrd qurady. Bul oraida taý-ken óndirý ónerkásibine kapital tartý deńgeii 35,7%-ǵa ósip, $3,5 mlrd qurady.
«Biz Eýroodaqtyń Qazaqstannyń taý-ken ónerkásibine qyzyǵýshylyq tanytyp otyrǵanyn kórip otyrmyz. Osy saladaǵy yntymaqtastyqtyń áleýeti zor. Osyǵan bailanysty Eýropalyq Odaq elderiniń geologiialyq qyzmetterin tsifrlandyrý, geologiia ǵylymyn damytý jáne salalyq infraqurylym salasynda seriktes bolýǵa shaqyramyz», — dedi Álihan Smaiylov.
Premer-Ministr salany avtomattandyrý aiasynda jer qoinaýyn paidalaný salasyndaǵy barlyq qoldanystaǵy aqparattyq júielerdi biriktirý jáne integratsiialaý arqyly Kaznedra biryńǵai platformasy qurylatynyn atap ótti. Bul platforma investorlarǵa «bir tereze» rejiminde keshendi servistik qyzmet kórsetýge yqpal etetin bolady.
Sonymen qatar Úkimet basshysy geologiialyq barlaý jumystarynyń dástúrli túrlerimen qatar, Qazaqstandy geofizikalyq zertteýlerdiń ozyq ádisteri qyzyqtyratynyn atap ótti.
«Osy múmkindikti paidalana otyryp, Qazaqstannyń Eýroodaq elderimen ekonomikalyq yntymaqtastyqty keńeitý jáne nyǵaitý jónindegi nietiniń naqty ekenin taǵy da rastaǵym keledi», — dedi Álihan Smaiylov.
Otyrys barysynda qatysýshylar paidaly qazbalardy óndirý, jańa tehnologiialardy qoldaný, geologiialyq derekterdi tsifrlandyrý, investitsiialar tartý, ónerkásip qaldyqtaryn qaita óńdeý jáne qorshaǵan ortany qorǵaý máselelerin talqylady.
