QR Premer-Ministri Asqar Maminniń tóraǵalyǵymen ótken Úkimettiń selektorlyq otyrysynda elimizde qabyldanyp jatqan epidemiiaǵa qarsy sharalar jáne 18 shildede ótken keńeste Memleket basshysy bergen tapsyrmalardyń oryndalý barysy qaraldy, dep habarlaidy primeminister.kz saity.
Qazaqstanda epidemiologiialyq jaǵdaidyń birshama turaqtalý deńgeiine shyqty. Respýblika boiynsha koronavirýs juqtyrǵandardyń ósimi 2,1% quraidy, eń tómengi ósim táýligine Shymkentte – 1%, Qyzylorda oblysynda – 0,9%, Túrkistan oblysynda – 0,8%, Aqtóbe oblysynda – 0,5% tirkelip otyr.
Jalpy tósek-oryn qory 30,4 myńnan 49,7 myń tósek-orynǵa deiin ulǵaityldy. Provizorlyq tósek-orynnyń bos bolmaýy 20%-ǵa (89%-dan 69%-ǵa deiin) jáne reanimatsiialyq tósek-orynnyń bos bolmaýy 6%-ǵa (73%-dan 67%-ǵa deiin) azaidy. COVID-ten saýyǵyp ketkenderdiń sany 60%-ǵa ósti, jedel járdemdi shaqyrýlar sany 23%-ǵa tómendedi.
Ambýlatorlyq deńgeide úide meditsinalyq kómek kórsetý úshin 2962 BMSK mobildi brigadasy quryldy. Osy aidyń sońyna deiin mundai brigadalar sany 3500 deiin jetkiziledi. Emhanalardaǵy Call-ortalyqtar sany 16%-ǵa artty.
Búgingi tańda infektsiialyq jáne provizorlyq statsionarlarda 1958 ÓJJ apparaty bar, qosymsha 4183 apparat satyp alynady, 21 myńnan astam tósek-oryn ottegige, 6237 oryn ottegi kontsentratorlarynyń esebinen qosylady. Búginde PTR-testileýdiń qýaty táýligine 32 myń zertteýdi quraidy. Biylǵy jyldyń 1 tamyzyna qarai bul kórsetkish táýligine 35,6 myńǵa deiin, aǵymdaǵy jyldyń 1 qyrkúiegine qarai táýligine 64 myńǵa deiin jetkiziledi.
Ambýlatorlyq kómek kórsetý úshin aýylda 1493 mobildi brigada qurylyp, jumys isteidi, bul qajettiliktiń 94%-yn jabady. Aýylda 641 jedel meditsinalyq járdem mashinasy tartylǵan.
Úkimet basshysy ákimdikterge, densaýlyq saqtaý jáne indýstriia ministrlikterine óńirlerdegi aýrýhanalardy qajettilikterine sai ÓJJ apparattarymen a.j. tamyzdyń sońyna deiin qamtamasyz etýdi tapsyrdy.
Densaýlyq saqtaý ministrligine ákimdiktermen jáne Aýyl sharýashylyǵy ministrligimen birge shildeniń sońyna deiin óńirlerde veterinarlyq zerthanalar bazasynda PTR-testileý jónindegi jumysty uiymdastyrý jáne kadrlarmen jasaqtaýdy qamtamasyz etý, ákimdikterge analizderdi óńirlerdiń zerthanalaryna jetkizýdiń tiimdi logistikasyn pysyqtaý tapsyryldy.
Indýstriia, densaýlyq saqtaý jáne qarjy ministrlikterine shuǵyl túrde óńirlerdi kóshpeli diagnostikalyq keshendermen, aýdandyq aýrýhanalardy otandyq óndiristiń tsifrlyq rentgen apparattarymen jaraqtandyrý máselesin shuǵyl sheshý, Densaýlyq saqtaý ministrligi men ákimdikterge eki apta ishinde ottegi kontsentratorlary men meditsinalyq gazdardyń tolyq kólemin óńirlerge jetkizýdi qamtamasyz etý jóninde tapsyrma berildi.
«SQ Farmatsiia»-ǵa aǵymdaǵy jyldyń shilde aiynyń sońyna deiin dári-dármek satyp alyp, olardy qosymsha bir aiǵa jetetin kólemde óńirlerge bólý, sondai-aq olardyń dári-dármek qajettiligin josparlaýdyń naqty júiesin belgileý júkteldi.
Premer-Ministr sonymen qatar Almaty, Nur-Sultan qalalary men Aqtóbe oblysynyń úlgisi boiynsha ár óńirde Turaqtandyrý qorlarynda dárilik zattar men meditsinalyq buiymdardyń qajetti qoryn jasaý týraly tapsyrma berdi.
Aita keteiik, jiynda Densaýlyq saqtaý ministri A. Tsoi, Nur-Sultan qalasynyń ákimi A. Kólginov, Shymkent qalasynyń ákimi M. Áitenov, Qaraǵandy oblysynyń ákimi J. Qasymbek, Aqtóbe oblysynyń ákimi O. Orazalin baiandama jasady.
