Qazaqstannyń Soltústik Atlantikalyq Shart Uiymy (NATO) janyndaǵy Ókildiginiń basshysy, Belgiiadaǵy Elshisi Marǵulan Baimuhan NATO-nyń Bas hatshysy Iens Stoltenbergke senim gramotalaryn tapsyrdy.
Bul týraly "Ult aqparat" Syrtqy ister ministrliginiń baspasóz qyzmetine silteme jasap habarlaidy.
Resmi rásimnen keiingi kezdesý barysynda taraptar Qazaqstannyń NATO-men yntymaqtastyǵynyń qazirgi ahýaly men keleshegin, sondai-aq halyqaralyq jáne óńirlik qaýipsizdiktiń ózekti máselelerin talqylady. Sondai-aq, «Bir seriktes – bir jospar» tujyrymdamasy aiasynda Qazaqstan men NATO arasyndaǵy 2022–2025 jyldarǵa arnalǵan jańa Beiimdelgen seriktestik baǵdarlamasyna bailanysty máseleler qozǵaldy. Budan bólek, taraptar Aýǵanstandaǵy jaǵdai jáne aýǵan halqyna gýmanitarlyq kómek kórsetý jónindegi yqtimal sharalar týraly pikir almasty.
Otandyq diplomat NATO-nyń Bas hatshysyna Qazaqstannyń halyqaralyq qaýipsizdikti nyǵaitýǵa qosqan úlesi týraly, atap aitqanda, «BUU-nyń Livandaǵy ýaqytsha kúshteri» (UNIFIL) missiiasyna qatysý úshin Qazaqstannyń bitimgershilik rotasynyń 120 áskeri qyzmetshisin Livanǵa jiberý týraly aityp berdi.
