Memleket kásipkerlikti «daǵdarysqa qarsy» kreditteýden birtindep shyǵyp kele jatyr, dep habarlaidy QazAqparat ranking.kz portalyna silteme jasap.
Ótken jyly qazaqstandyqtardy koronavirýs infektsiiasynan qorǵaý úshin uzaqmerzimdi karantindik jáne shekteý is-sharalary engizilgen edi. Dál osy jait el ekonomikasyna teris áserin tigizdi. Biznes pen azamattardyń ekonomikalyq belsendiligi aitarlyqtai tómendep, kóptegen kásiporyn óndirisin qysqartty nemese suranystyń joqtyǵynan qyzmetin toqtatýǵa májbúr boldy. 2020 jyldyń basynan 2021 jyldyń naýryzyna deiin iskerlik belsendilik indeksi teris aimaqta turdy. Pandemiianyń kúrdeli kezeńinde el Prezidenti ekonomikanyń odan ary quldyraýyna jol bermeý úshin qoldaý is-sharalaryn qolǵa alýdy tapsyrdy. Osydan keiin daǵdarysqa qarsy is-sharalarǵa 6,3 trln teńge bólindi.
Bul bastamalardy júzege asyrýǵa qatysqan vedomstvolardyń biri – QR Ulttyq banki. Retteýshi úlesi 2,3 trln teńgeni nemese daǵdarysqa qarsy is-sharalar kóleminiń úshten birin qurady.
Otandyq kásiporyndarǵa jalpy somasy 977,2 mlrd teńge bolatyn 3 362 jeńildetilgen zaim berildi. Bul ekonomikanyń basym salalarynda, onyń ishinde qaita óńdeý ónerkásibi men agroónerkásip kesheninde jumys isteitin kásiporyndarǵa óndiristik áleýetin saqtaýǵa múmkindik berdi.
Qoldaý is-sharalarynyń arqasynda 1,5 myń kásipker iskerlik belsendiligin saqtap, 95 myńnan astam azamattyń turaqty jumyspen qamtylýyna múmkindik berdi. Retteýshi bólgen qarajat 1,1 trln teńgege 11,5 myńnan astam jobany qarjylandyrýǵa baǵyttaldy. Sonymen qatar Memleket basshysynyń tapsyrmasymen Ulttyq bank Jumyspen qamtý jol kartasyn júzege asyrýǵa qatysty. Bank baǵdarlamaǵa bólingen 1,1 trln teńgeniń 800 mlrd teńgesin qamtamasyz etti. Bul 2020 jyldyń qorytyndysynda 6,5 myńnan astam infraqurylymdyq jobany júzege asyrýǵa jumys oryndaryn saqtap qalýǵa, elimizdiń barlyq óńirinde 238,9 myń ýaqytsha jáne 6,6 turaqty jumys ornyn ashýǵa múmkindik berdi.
Ekonomika ósiminiń qarqyny qaita qalpyna kelgennen keiin Ulttyq bank memlekettik baǵdarlamalardy qoldaýdan birtindep bas tarta bastady. Ekonomikany kreditteý baǵdarlamasynan shyǵý eń aldymmen qarjylandyrý tek qana naryqtyq printsiptermen júzege asyrylýy úshin qajet. Qarjy naryǵynyń tabysty damýy aqsha resýrstarynyń qunyn naryq anyqtaityn básekelestik ortanyń qalyptasýymen tikelei bailanysty. Retteýshiniń kreditteý baǵdarlamasyna qatysýyn jalǵastyrýy baqylaýsyz infliatsiianyń ósýine, valiýta naryǵynyń turaqsyzdanýyna, sonyń saldarynan uzaqmerzimdi ekonomikalyq ósimniń tómendeýine alyp kelýi múmkin.
