Bishkekte ótip jatqan Eýraziia ekonomikalyq forýmynda elimizde ótken jyly qurylǵan tehnikalyq retteý jónindegi úilestirý ortalyǵynyń jumysy tanystyryldy, dep habarlaidy QazAqparat.
«Qazaqstanda ótken jyldyń 1 shildesinen bastap tehnikalyq retteý jónindegi úilestirý ortalyǵy jumys istep jatyr. Atalǵan ortalyqtyń negizgi mindetterine tehnikalyq reglament jobalary men olarǵa ózgerister boiynsha ustanymdy qalyptastyrýǵa qatysý, kásiporyndardyń tehnikalyq reglamentterdi engizýge infraqurylymdyq ázirligin taldaý jáne tehnikalyq reglamentterdi qoldaný boiynsha monitoring júrgizý kiredi. Sonymen qosa tehnikalyq reglamentter men standarttardyń ǵylymi-tehnikalyq deńgeiin baǵalaý mindeti jatady», - dedi QR Saýda jáne integratsiia ministrligi tehnikalyq retteý jáne metrologiia komitetiniń tóraǵasy Arman Ábenov Bishkekte ótip jatqan Eýraziia ekonomikalyq forýmynda.
Sondai-aq, komitet basshysy atalǵan úilestirý ortalyǵynyń jumysyn EAEO kóleminde keńeitýdi usyndy.
«Biz 2010 jyldan bastap tehnikalyq reglamentterdi ázirleýmen tikelei ainalysatyn kásibi mamandar men salanyń úzdik sarapshylaryn úilestirý ortalyǵynda jumys isteýge shaqyrdyq. Bul institýtsionaldyq jadty saqtaý maqsatynda jasalyp otyr. Osy oraida bizdiń komitet EAEO-ǵa múshe memleketterde tehnikalyq retteý jónindegi úilestirý ortalyqtaryn qurýdyń uqsas modelin ázirleýdi usynady. Eýraziialyq integratsiiany damytýdyń 2025 jylǵa deiingi strategiiasynda standarttaý jumysyn josparlaýdy úilestirýge, standarttaý salasyndaǵy ǵylymi-zertteý jumystaryn júieli damytýdy qamtamasyz etý jáne EAEO-nyń tiisti aktilerin qabyldaý maqsatynda júrgizýge baǵyttalǵan is-sharalar kózdelgen», - dedi Arman Ábenov forýmda.
