Qazaqstan Donetsk pen Lýganskini moiyndaý máselesin kótermeidi. Bul týraly QR Syrtqy ister ministri Muhtar Tileýberdi aitty, dep habarlaidy QazAqparat.
«Donetsk pen Lýgansk Halyq Respýblikalary tóńiregindegi shieleniske qatysty Qazaqstan ustanymy jaiynda aitar bolsaq, Resei Prezidentiniń atalǵan respýblikalardy moiyndaý týraly Jarlyqqa qol qoiǵanyn bárińiz bilesizder. Birinshiden, Reseidiń nelikten mundai sheshim qabyldaý sebebin saraptaý qajet. Batys pen Resei arasynda qaýipsizdik júiesine qatysty ýaǵdalastyqtyń joq ekendigi túsinikti. Resei tarapy Resei men AQSh, sonymen qatar RF men NATO arasyndaǵy kelisim jobalaryn jibergen bolatyn. Bul kelisim boiynsha qazirgi ýaqytta ýaǵdalastyqqa qol jetkizilmedi. Ekinshiden, «normand formatyna» qatysýshylar Minsk kelisimin júzege asyrý joldaryna qatysty ózara túsinistikke kele almady ári qabiletsiz bolyp shyqty. Bul da sebepterdiń biri. Úshinshiden, Donetsk pen Lýganskidegi gýmanitarlyq daǵdarys jaiynda aityp otyrmyz. Qazirgi ýaqytta atalǵan respýblikalardan Reseige qarai bosqyndar aǵylyp jatyr», - dedi ministr Úkimet otyrysynan keiin BAQ ókilderiniń saýalyna orai.
Osy rette ol Resei Prezidentiniń Donetsk pen Lýganskini moiyndaý týraly Jarlyǵyna qatysty Qazaqstannyń resmi ustanymy ázirlenip jatqanyn aitty.
«Taiaý saǵattyń ishinde Qazaqstan Qaýipsizdik keńesiniń otyrysy ótip, onda Qazaqstannyń resmi ustanymyn qabyldaimyz. Biraq, Qazaqstannyń Donetsk pen Lýganskini moiyndaý máselesi kóterilip otyrmaǵandyǵyna sendirgim keledi. Biz halyqaralyq quqyq negizderin jáne BUU Jarǵysynyń negizgi ustanymdaryn ustanamyz. Qazir ahýal nasharlap, shielenis kúsheiip bara jatqany túsinikti. Sondyqtan Qazaqstan barlyq halyqaralyq qoǵamdastyqty shielinisti sheshýde diplomatiialyq kúsh-jigerdi qoldanýǵa shaqyrady ári soǵan daiyn», - dedi Muhtar Tileýberdi.
