Qazaqstan dizel otyny eksportyna shekteý qoiady. Bul týraly búgin QR Energetika ministrliginiń keńeitilgen alqa májilisinde vedomstvo basshysy Qanat Bozymbaev aitty, dep habarlaidy QazAqparat tilshisi.
«Dizel otyny tapshylyǵyna jol bermeý maqsatynda ministrlik búgingi kúni elden tysqary aýmaqqa dizel otynyn shyǵarýǵa ýaqytsha shekteý qoiýdy qarastyratyn buiryq ázirledi jáne ol kelisim kezeńinde tur», - dedi ministr.
Onyń aitýynsha, 2018 jyly elimizdiń janarmai quiý stansalarynda dizel otyny baǵasynyń ósýi baiqalǵan. Mundai jaitqa kóktemgi-kúzgi kezeńderde aýyl sharýashylyǵy taýaryn óndirýshilerdiń dizel otynyn kóp paidalanýy, tranzitttik tasymal kóleminiń artýy, sonymen qatar importqa táýeldiliktiń saqtalýy sebep bolǵan.
«Taǵy bir sebep - EAEO elderinde, taiaý kórshilerde dizel otyny baǵasynyń aitarlyqtai joǵary bolýy. Mundai jaǵdaida otynnyń kórshi elderge aǵylýy, soǵan bailanysty baǵanyń joǵarylaýy - túsinikti jait», - dedi Q.Bozymbaev.
Sonymen qatar, ministr 2018 jyldyń basynda AI-92 markaly benzinniń bólshek baǵasynyń tómendegeni baiqalǵanyn aitty.
«Al osy jyldyń aqpanynda AI-92 benzininiń eń tómengi baǵasy Almaty qalasynda 139 teńgeni qurady», - dedi ol.
