Densaýlyq saqtaý ministri Aleksei Tsoi «Qazaqstan depýtattary vaktsina saldyrdy ma?» degen suraqqa jaýap berdi, dep habarlaidy QazAqparat.
«Meniń oiymsha, qandai da bir memlekettik organǵa nemese qandai da bir uiymǵa basa nazar aýdarýdyń qajeti joq. Ereje barlyǵyna birdei. Vaktsina salǵyzbaǵandardyń bári ár jeti kún saiyn PTR testtiń teris nátijesimen kelýi kerek. Degenmen, bizge aldyn-ala belgili bolǵandai, depýtattyq korpýs óte belsendi túrde vaktsina alǵan. Ekpe almaǵandardyń da meditsinalyq nemese naýqas bolýyna bailanysty qarsy kórsetilimderi bar. Vaktsina saldyrý paiyzy aitarlyqtai joǵary», - dep jaýap berdi Densaýlyq saqtaý ministri Ortalyq kommýnikatsiialar qyzmetinde.
Ministrdiń aitýynsha, barlyq memlekettik organdardyń qyzmetkerleri belsendi túrde vaktsina alǵan.
«Barlyq basqa kásiporyndarǵa qandai uiym bolǵanyna qaramastan, ereje ortaq. Barshańyzdy vaktsina saldyrýǵa jáne otbasylaryńyzdy qorǵaýǵa shaqyramyz», - dedi Aleksei Tsoi.
