Premer-Ministrdiń orynbasary – Syrtqy ister ministri Muhtar Tileýberdi bastaǵan Qazaqstan delegatsiiasy Resei astanasynda ótken Táýelsiz Memleketter Dostastyǵy Syrtqy ister ministrleri keńesiniń kezekti otyrysyna qatysty. Bul týraly SIM habarlady.
TMD elderiniń syrtqy saiasi vedomstvolarynyń basshylary halyqaralyq kún tártibindegi ózekti máselelerdi, onyń ishinde óńirlik qaýipsizdik problematikasyn, ekonomikalyq jáne mádeni-gýmanitarlyq salalardaǵy yntymaqtastyqtyń jai-kúii men perspektivalaryn talqylady. 2020 jyly Dostastyq memleketteri Syrtqy ister ministrlikteriniń beiindi departamentteriniń ózara is-qimyly týraly aqparat tyńdaldy.
Otyrysqa qatysýshylar qaýipsizdik pen quqyqtyq tártipti qamtamasyz etý salasyndaǵy kópjaqty yntymaqtastyqty keńeitýdi kózdeitin qujattardy maquldady.
TMD Úkimet basshylary keńesiniń sheshimin oryndaý úshin syrtqy ister ministrleri dene shynyqtyrý jáne sport salasyndaǵy, sondai-aq týrizm jáne jastar bailanystary salasyndaǵy kópjosparly yntymaqtastyqty damytý jónindegi qysqa merzimdi is-sharalar josparyn bekitti. Taraptar 1941-1945 jyldardaǵy Ekinshi dúniejúzilik soǵystyń bastalýynyń 80 jyldyǵyna bailanysty TMD memleketteri basshylarynyń Dostastyqqa qatysýshy memleketter halyqtaryna jáne álemdik qoǵamdastyqqa úndeýiniń jobasyn kelisti.
TMD SIMK otyrysy aiasynda M.Tileýberdi Túrikmenstan Ministrler Kabineti Tóraǵasynyń orynbasary – Syrtqy ister ministri Rashid Meredovpen ekijaqty kelissózder júrgizdi. Taraptar qazaqstan-túrikmen qatynastarynyń joǵary qarqynyn atap ótti, sondai-aq eki memleket basshylarynyń qatysýymen ótetin aldaǵy joǵary deńgeidegi kezdesýlerge daiyndyq máselelerin talqylady.
