Búgin Qazaqstan Respýblikasy Prezidentiniń Halyqaralyq yntymaqtastyq jónindegi arnaýly ókili Erjan Qazyhan bastaǵan qazaqstandyq delegatsiia Kabýl qalasyna jumys saparymen bardy, dep habarlaidy "Ult aqparat" Aqordaǵa silteme jasap.
Sapar aiasynda Arnaýly ókil Erjan Qazyhan Aýǵanstannyń qazirgi ákimshiliginiń ókilderi Abdýl Ǵani Baradarmen jáne Amir Han Mýtakkimen kezdesý ótkizdi.
Kezdesýler barysynda Qazaqstannyń aýǵan halqyna kórsetip jatqan gýmanitarlyq kómegi men saýda-ekonomikalyq bailanystardy qalpyna keltirý máseleleri talqylandy.
Elimiz delegatsiiasynyń basshysy Qazaqstan Respýblikasynyń Prezidenti Qasym-Jomart Toqaevtyń Ókimimen Aýǵanstanǵa gýmanitarlyq kómek retinde 5 myń tonna un jetkizilgenin atap ótti. Sondai-aq Erjan Qazyhan Qazaqstannyń aýǵan tarapyna otandyq QazVac vaktsinasyn berý týraly usynysyn jetkizdi.
Arnaýly ókil Qazaqstannyń BUU agenttikterimen birlesip, Aýǵanstan halqyna jetkiziletin gýmanitarlyq kómekti odan ári keńeitý maqsatynda qabyldap jatqan sharalary týraly aitty.
Aýǵan tarapy kórsetilgen gýmanitarlyq kómek úshin alǵys bildirip, Aýǵanstandy qalpyna keltirý jónindegi halyqaralyq kúsh-jigerge elimizdiń eleýli úles qosyp otyrǵanyn atap ótti.
Taraptar dástúrli saýda-ekonomikalyq bailanystardy qalpyna keltirýge jáne aýǵan stýdentteri úshin Qazaqstanda bilim berý baǵdarlamalaryn jalǵastyrýǵa qyzyǵýshylyq tanytty. Aýǵan tarapy qazaqstandyq vaktsinany jetkizý týraly usynysty da zor yqylaspen qabyldady.
Sonymen qatar Erjan Qazyhan BUU Bas hatshysynyń Arnaýly ókili, BUU-nyń Aýǵanstanǵa járdem berý jónindegi missiiasynyń basshysy Debora Laionspen kezdesti. Kezdesýde osy eldegi gýmanitarlyq jáne azyq-túlik daǵdarysyn eńserýde Qazaqstan men BUU-nyń ózara yntymaqtastyǵyn keńeitý máseleleri qarastyryldy.
