Búgin fýtboldan Qazaqstan chempionaty birinshi týrynyń keiinge qaldyrylǵan oiyny ótti, dep habarlaidy QazAqparat.
Bul oiynda Shymkenttiń «Ordabasy» jáne Petropavldyń «Qyzyljar» komandalary kezdesti.
Eki komanda týrnir kestesinde qatarlas keledi. Ekeýiniń biri jeńiske jetken jaǵdaida tórtinshi orynǵa kóteriletin edi. Qarjylyq jaǵdaiyna bailanysty «Ordabasy» quramynan birqatar fýtbolshylar komanda aýystyrdy. Sondyqtan shymkenttik klýbta búgin negizinen jas oiynshylar sany basym boldy. Al «Qyzyljar» bapkerleri olarǵa negizgi quramdy qarsy qoidy.
Atalǵan kezdesýde «Qyzyljar» komandasy basymdyq kórsetti. Nátijesinde alań ieleri qaqpasyna jaýapsyz bes gol soǵyp ketti. Olardyń qatarynan Iýrii Býshman 2-minýtta esep ashsa, odan keiin 9-minýtta Valerii Karshakevich esepti ústemelei tústi.
Ekinshi kezeńniń 57-minýtynda Darko Zorich mergendik tanytyp, «Qyzyljardyń» basymdyǵyn arttyrdy. Al 62-minýtta «Ordabasy» oiynshysy Aleksandr Simchevich avtogol avtory atansa, 79-minýtta Pavel Iakovlev petropavldyq klýbtyń búgingi kezdesýdegi sońǵy golyn soqty.
Atalǵan jeńisten keiin «Qyzyljar» 29 upaimen tórtinshi orynǵa kóterildi. Kósh basynda 42 upaimen «Tobyl» komandasy keledi. Odan keiingi oryndardaǵy «Astananyń» 41, «Qairattyń» 37 upaiy bar.
Qazir el birinshiliginde ulttyq quramanyń aldaǵy oiyndaryna bailanysty azdaǵan úzilis jariialandy. Endi 20-týr oiyndary 12 qyrkúiek kúni jalǵasady.
