7 maýsym kúni ótken BUU Bas Assambleiasynyń 73-shi plenarlyq otyrysynda Qazaqstan BUU Ekonomikalyq jáne áleýmettik keńesiniń (EKOSOK) quramyna 2022-2024 jyldarǵa sailandy. Bul týraly QR Syrtqy ister ministrliginen málim etti, dep habarlaidy "Ult aqparat".
Keńes BUU-nyń ekonomikalyq, áleýmettik jáne ekologiialyq qyzmetin úilestirýge jaýapty negizgi organ jáne osy salalardaǵy ózekti problemalar boiynsha sheshimderdi ilgeriletýge arnalǵan ortalyq alań bolyp tabylady.
«Qazaqstan EKOSOK-ta jahandyq Ornyqty damý salasyndaǵy maqsattardy tiimdi iske asyrý jáne Ortalyq Aziiadaǵy neǵurlym mańyzdy gýmanitarlyq problemalardy sheshý úshin halyqaralyq qarjy jáne saýda uiymdarymen yntymaqtastyqty nyǵaitýǵa járdemdesýge nietti.
Keńeske múshelik Qazaqstanǵa ekonomika, áleýmettik sala jáne memlekettik basqarý reformalaryn júzege asyrý maqsatynda tabysty álemdik tájiribeni tartýǵa da yqpal etetin bolady», - delingen QR SIM habarlamasynda.
Málim etilgendei, daýys berý qorytyndysy boiynsha BUU EKOSOK músheligine AQSh, Aýǵanstan, Beliz, Belgiia, Italiia, Kanada, Kot-d'Ivýar, Mavrikii, Oman, Perý, Tanzaniia, Týnis, Úndistan, Horvatiia, Chehiia, Chili jáne Esvatini ótti.
«Qazaqstannyń kandidatýrasyn 180 memleket qoldady. Buǵan deiin Qazaqstan BUU EKOSOK quramyna 2007–2009 jáne 2014–2016 jyldar kezeńine eki ret sailandy», - dep naqtylady syrtqysaiasat vedomstvosynan.
