BUU Qaýipsizdik keńesinde Aýǵanstandaǵy ahýal boiynsha ashyq pikirtalastar ótti, dep habarlaidy "Ult aqparat" SIM baspasóz qyzmetine silteme jasap.
Bul otyrysta baiandamashylar retinde Aýǵanstanǵa kómek kórsetý jónindegi BUU missiiasynyń basshysy Tadamichi Iamamoto, BUU Esirtki jáne qylmys boiynsha basqarmasynyń Atqarýshy direktory Iýrii Fedotov, BUU QK 1988 «Taliban/Aýǵanstan» boiynsha sanktsiialyq komitetiniń tóraǵasy Qairat Omarov, sondai-aq Aýǵanstandaǵy Beibitshilik boiynsha Joǵary keńsesiniń múshesi Vadjma Frog sóz sóiledi.
Sonymen qatar, BUU Qaýipsizdik keńesiniń músheleri jáne basqa da múddeli memleketterdiń ókilderi óz baiandamalaryn jasady.
Qatysýshylar Aýǵanstandaǵy qiyn jaǵdaidy, sonyń ishinde terroristik áreketter sanynyń ósýin, soltústik aimaqtarda DAISh jaýyngerleriniń kóbeiip, eldegi esirtki óndirisiniń qanat jaiýyn talqylap ótti. Sonymen qatar, Aýǵanstan Úkimeti men halyqaralyq qoǵamdastyqtyń eldegi jaǵdaidy turaqtandyrý jónindegi sharalardyń, ulttyq tatýlastyrý, ekonomikalyq damý, áielderdiń quqyqtaryn qorǵaý jáne ilgeriletý, aldaǵy eki jylda prezidenttik jáne parlamenttik sailaýdy sapaly daiyndaý jáne ótkizý boiynsha máselerdiń mańyzdylyǵyna erekshe kóńil aýdaryldy.
Kóptegen memleketter óz sózderinde BUU Qaýipsizdik Keńesindegi Ortalyq Aziiadan shyqqan alǵashqy múshesi sanalatyn Qazaqstanǵa onyń Aýǵanstan men Ortalyq Aziia aimaǵyndaǵy qaýipsizdikti qamtamasyz etý máselelerine airyqsha nazar aýdarǵany úshin óz alǵystaryn bildirdi. Olardyń pikiri boiynsha, mundai is-sharalar atalǵan óńirde qalyptasqan jaǵdaidy tereńirek túsinýge septigin tigizedi.
Qazaqstandyq delegatsiiasynyń pikirine qaraǵanda, memleketter arasyndaǵy tyǵyz aimaqtyq ekonomikalyq yntymaqtastyq aýǵan azamattarynyń beibit áreketterge qatysýyna yqpal etip, qarýly toptarǵa jáne esirtki óndirisine qatysýyn azaitatyn bolady. Bul eldegi jáne tutastai alǵanda, aimaqtaǵy qaýipsizdik jaǵdaiyna oń áserin tigizedi.
Q. Omarov Qazaqstannyń óńirlik integratsiianyń turaqty jaqtaýshysy bolyp tabylatynyn jáne kóliktik infraqurylymǵa investitsiia salyp, Aýǵanstanǵa gýmanitarlyq kómek kórsetip kelgenin atap ótti.
Otyrysqa qatysýshylar halyqaralyq qoǵamdastyqtyń Aýǵanstannyń beibitshilik pen gúldenýge qol jetkizýine járdemdesýge qoldan kelgendi aiamaityndyǵyn jetkizdi.
