Qazaqstan BUU elderindegi elektrondy úkimetter reitingisinde 28-orynǵa taban tiredi. Bul eldegi memlekettik qyzmet kórsetý salasynda sybailas jemqorlyqtyń joiylyp bara jatqanyn kórsetedi. Osyndai oiymen Almatyda «Qazaqstandaǵy quqyq qorǵaý jáne sot júiesin jańǵyrtýdyń ózekti máseleleri» atty halyqaralyq dóńgelek ústel barysynda QR Sybailas jemqorlyqqa qarsy is-qimyl agenttiginiń tóraǵasy Alik Shpekbaev bólisti, dep habarlaidy "Ult aqparat".
Halyqaralyq shara Qazaqstan Sarbonna institýtynda ótip jatyr.
Agenttik tóraǵasy memlekette sońǵy jyldary sybailas jemqorlyqqa qarsy engizilgen birneshe is-qimyl paketteri jaily aitty.
Onyń aitýynsha, birinshi paket boiynsha antikorrýptsiialyq saraptama qalpyna keltirilgen. Osy salaǵa bailanysty qoǵamnyń tikelei qatysýymen normativtik quqyqtyq aktiler qabyldandy.
Ekinshi pakette de asa mańyzdy sharalar qabyldanǵan.
«Atap aitqanda, kvazimemlekettik sektordaǵy sybailas jemqorlyqqa qarastyrylǵan jaýapkershilik kúsheitildi. Týysqandardyń bir uiymda jumys isteýine shekteý qoiyldy. Syilyq alýǵa tyiym salyndy. Sonymen qatar, memlekettik qyzmetkerlerin, quqyq qorǵaý organdarynyń qyzmetkerlerin para alýǵa itermelegen adamdarǵa jaýapkershilik kúsheitildi. Burynǵy eskirgen kúres tetikterin jasandy intellekt, blokchein, bigdata tehnologiialary almastyryp jatyr. Qazir tsirflandyrý aiasynda osy tehnologiialar engizilip jatyr. Qazaqstanda memlekettik qyzmetterdiń 90 paiyzy elektrondy formatqa aýystyrylǵan. Iaǵni, biz tolyǵymen osy saladaǵy sybailas jemqorlyqty joidyq dese de bolady. Qazaqstan BUU elektrondy úkimetteri reitinginde 28-orynǵa taban tiredi. Eger, eletkrondy formatta kórsetiletin memqyzmetterdiń úlesi 90 paiyzǵa jetse, bul elde sybailas jemqorlyq joq dep sanaidy», - dedi agenttik tóraǵasy.
Úshinshi pakette kórsetilgen sharalarǵa qatysty Memleket basshysy jaqynda jarlyqqa qol qoidy.
«Ol aldyńǵy paketterge qaraǵanda sybailas jemqorlyq úshin qarastyrylǵan jazany kúsheitýge baǵyttalǵan. Áńgime memlekettik qyzmetshiler men depýtattardyń, sýdialardyń sheteldik bankterde shotynyń bolýyna tyiym salyný týraly bolyp jatyr. Aýyr jáne asa aýyr korrýptsiialyq qylmysy úshin otyrǵan tulǵalar ýaqytynan buryn shartty túrde bosap shyǵa almaidy», - dedi A.Shpekbaev.
Onyń aitýynsha, kelesi jyly sybailas jemqorlyqqaqarsy tórtinshi paket iske qosylmaq.
«Ol halyqaralyq tájiribedegi úzdik standarttardy engizýge baǵyttalady. Atap aitqanda, jariia qylýshy tulǵalardy qorǵaý boiynsha keshendi sharalar, adamgershilik printsipterine negizdelgen «integriti chek» tekserý institýtyn qurý qolǵa alynady. Qazirgi tańda Qazaqstanda sybailas jemqorlyqqa qarsy zańnama kúrdeli modernizatsiialyq kezeńnen ótip jatyr. Byltyr jyl sońynda biz Eýropa keńesi, GREKO elderiniń tolyqqandy 50-múshesi bolyp qabyldandyq», - dedi ol.
