Belarýs prezidenti Aleksandr Lýkashenko EAEO elderi basshylaryn biyl kúzde óz eline kelýge shaqyrdy, dep habarlaidy Sputnik Qazaqstan.
Búgin Joǵary Eýraziialyq ekonomikalyq keńestiń kezekti otyrysy pandemiiaǵa bailanysty beinebailanys formatynda bastaldy.
"Sizderdi kórgenime qýanyshtymyn. Kópten kórisken joqpyz, bir-birimizdi saǵyndyq. Qazaqstan buryn qonaqjai edi, qonaqqa shaqyratyn. Al qazir nege ekeni belgisiz jabylyp qaldy. Vaktsina jaqsy, halyqqa ekpe saldyrý qarqyndy júrip jatyr dep aitamyz. Ol ras. Biraq birtúrli kezdese almai júrmiz", - dedi Belarýs prezidenti Aleksandr Lýkashenko.
Ol áriptesterin biyl qazan aiynda el astanasy Minskke qonaqqa shaqyrdy.
"Sizderdi osynda qýana qarsy alamyn. Ókinbeisizder degen oidamyn. Ókinishke qarai, pandemiiaǵa bailanysty ázirge osyndai formatta aralasýǵa týra kelip tur", - dedi prezident.
Qazaqstan prezidenti Qasym-Jomart Toqaev qazaq halqynyń qonaqjailyǵyna kúmándanbaýǵa shaqyrdy.
"Aleksandr Grigorevich, dástúrli este qalarlyq sózińiz úshin alǵys aitamyn. Áriptesterime aitarym: bizdiń qonaqjailyǵymyzǵa kúmándanbańyzdar, kezdesýdi onlain ótkizý týraly sheshimdi bárimiz aqyldasyp qabyldadyq. Biz memleket basshylarynyń densaýlyǵy men qaýipsizdigine alańdaimyz. Indet áli basylǵan joq, sol sebepti saqtanyp júrgen abzal", - dedi prezident.
Aita ketsek, Qazaqstan prezidenti Qasym-Jomart Toqaevtyń tóraǵalyǵymen beinebailanys rejiminde Joǵary eýraziialyq ekonomikalyq keńestiń kezekti otyrysy bastaldy.
Oǵan JEEK qurmetti tóraǵasy, Qazaqstannyń tuńǵysh prezidenti Nursultan Nazarbaev, Resei prezidenti Vladimir Pýtin, Belarýs basshysy Aleksandr Lýkashenko, Qyrǵyz Respýblikasynyń prezidenti Sadyr Japarov, Armeniia premer-ministriniń mindetin atqarýshy Nikol Pashinian, Eýraziialyq ekonomikalyq komissiia alqasynyń tóraǵasy Mihail Miasnikovich qatysyp jatyr.
