Qazaqstan biyl 180 myń tonna benzol men paraksilol eksporttaidy. Bul týraly búgin Úkimet úiindegi baspasóz máslihatynda QR Energetika birinshi vitse-ministri Mahambet Dosmuhambetov aitty, dep habarlaidy "Ult aqparat".
«Bitým óndirý 702 myń tonnany nemese jospardyń 103 paiyzyn qurady. Óndirý kólemi elimizdiń jol salasynyń qajettiligin tolyǵymen qanaǵattandyrady. 2019 jylǵa arnalǵan jospar – 767 myń tonna», - dedi ol.
Onyń dereginshe, Atyraý munai óńdeý zaýytynda osy jyldyń 9 aiy ishinde 107 myń tonna hosh iisti kómirsýtek (benzol, paraksilol) óndirildi. Atalǵan ónim eksportqa baǵdarlanǵan. 2019 jylǵa arnalǵan jospar – 180 myń tonna. Sonymen qatar, osy jyldyń tamyz aiynda Almaty oblysynda mailaityn mai óndiretin zaýyt paidalanýǵa berilgen. Onyń qýaty jylyna 100 myń tonnany quraidy.
«Osy óndiris ishki naryqtyń jaǵarmaiǵa degen qajettiligin qamtamasyz etýge jáne jaqyn shetelge eksportty júzege asyrýǵa múmkindik beredi», - dedi Mahambet Dosmuhambetov.
