QR Mádeniet jáne sport vitse-ministri Serik Jarasbaev «Qazaqstan Beijińde ótetin Qysqy Olimpiadaǵa basqa elder sekildi diplomatiialyq boikot jariialai ma?» degen suraqqa jaýap berdi, dep habarlaidy QazAqparat.
«Keibir elderdiń bul másele boiynsha óz ustanymdaryn bildirgeni túsinikti, biraq el prezidenti Qasym-Jomart Toqaev bizdiń sportshylarymyzdy, qurama komandalardyń kapitandaryn jáne paralimpiadashylardy qabyldap, olarǵa Olimpiada oiyndaryna aparatyn Týdy tapsyrdy. Iaǵni, munda eshqandai boikot týraly sóz joq. Oǵan qosa, Syrtqy ister ministrligi Prezidenttiń Olimpiada oiyndaryna qatysýy máselesin pysyqtap jatyr. BAQ-ta Beijiń tarapy el basshylyǵyn resmi túrde shaqyrǵany týraly aqparat boldy. Osyǵan bailanysty, Olimpiadaǵa tolyqqandy qatysatynymyzdy aitqym keledi, bizde keibir elder kótergen máselelerge qatysýǵa esh negiz joq», - dedi Serik Jarasbaev.
Sonymen birge, bul máselege Ulttyq Olimpiada komitetiniń ókili de pikir bildirdi.
«Kúrish pen kúrmekti – sport pen úlken saiasatty ajyrata bilý kerek. Bul máselede de eki túrli nárse bar. Biz munda eki túrli álemniń qaqtyǵysyn kórip otyrmyz jáne sáikesinshe árqaisysy ózinshe áreket etedi. Biz saiasatty emes, sportty oilaimyz. Bul jerde bizdiń ustanymymyz birdei», - dedi Qazaqstan UOK Bas hatshysy Andrei Kriýkov.
