Qazaqstan benzindi avtomobilmen el aýmaǵynan shyǵarýǵa tyiym ýaqytyn uzartady. Bul týraly búgin Energetika ministrliginiń alqa otyrysynda vedomstvo basshysy Nurlan Noǵaev aitty, dep habarlaidy "Ult aqparat".
Onyń aitýynsha, 2019 jyly munaidy óńdeý kólemi 2018 jylmen salystyrǵanda 4,4 paiyzǵa ósip, 17,2 mln tonnany qurady.
«Bul rette, 2019 jyly munai ónimderiniń negizgi túrlerin óndirý kólemi 2018 jylǵa qaraǵanda 9,5 paiyzǵa ósti. Biylǵy jospar 12,5 mln tonnany quraidy. Aita ketý kerek, josparlar munai ónimderiniń ishki tutynýyn negizge ala otyryp eseptelgen. Eger qajettilik bolǵan jaǵdaida, jyl boiy óńdeý kólemin ulǵaitý úshin bizde rezerv bar», - dedi Energetika ministri.
Ministrdiń atap ótýinshe, qazaqstandyq munai óńdeý zaýyttaryn jańǵyrtý jumystary aiaqtalǵan soń ishki naryqtyń qajettiligi tolyǵymen ózimizdiń óndiris esebinen qamtamasyz etiledi. Bul rette 2019 jyldyń qorytyndysy boiynsha naryqtyń benzinmen, dizel otynymen jáne aviakerosinmen qamtamasyz etilýi 100 paiyzǵa jetkenin atap ótýi kerek.
«2019 jylǵy shilde aiynda tyiym salýdy alǵannan keiin benzindi Eýropaǵa jáne Ortalyq Aziiaǵa eksporttaý bastaldy. Benzinniń eksport kólemi 180,7 myń tonnany qurady. Sondai-aq, ministrlik janar-jaǵarmai tapshylyǵy faktilerin boldyrmaý maqsatynda munai ónimderin Qazaqstan Respýblikasynyń aýmaǵynan avtomobil kóligimen áketýge tyiym saldy. Ol ár 6 ai saiyn uzartylatyn bolady. Osyǵan bailanysty ýákiletti tulǵalarǵa buiryqtyń merzimin uzartý boiynsha qajetti sharalardy qabyldaýdy tapsyramyn», - dedi Nurlan Noǵaev.
