QR Tuńǵysh Prezidenti Nursultan Nazarbaev «Habar» telearnasyna bergen suhbatynda el Prezidenti laýazymynan nelikten bas tartqanyn túsindirdi, dep habarlaidy "Ult aqparat".
«Árine, ókinbeimin. Sebebi bul barlyq jaǵynan oilastyrylǵan sheshim bolatyn. Qazaqstan basshylyǵynda 30 jyl otyrǵanymdy umytpaý kerek. Ortalyq komitet múshesi bolǵan ótken ǵasyrdyń 1979 jylynan bergi ýaqytty eskersek - 40 jyl, al Qazaqstan úkimet basshysy bolǵan kezimnen beri eseptesek - 35 jyl. Eń aldymen osy jyldar boiy meni memleket basshysy etip sailaǵan halqyma rahmet. Qalai desek te, halyqtyń belgili bir bóligi bir adamnan sharshaǵan shyǵar. Mundai da jait bar. Ekinshiden, ózgerister qajet. Eshteńe de bir orynda turmaidy. Ózgerister, jańa adamdar, jańa kadrlar kerek. Kez kelgen adamnyń óz kózqarasy, paiymy bar. Sondyqtan bul túbegeili oilastyrylǵan, durys qadam dep oilaimyn. Bulai jasaǵanyma, kimdi murager etip alǵanyma esh ókinbeimin», - dedi Elbasy.
Nursultan Nazarbaev prezidenttik laýazymyn doǵarǵan kezde álemniń kóptegen iri memleketteriniń basshylary habarlasyp, ókinish bildirgenin eske aldy.
«Biz osy jyldar ishinde tańǵalalarlyq uly jetistikterge jettik. Qazaqtar óz tarihynda bulai ómir súrip kórgen emes. Bul - fakti. Bizden basqa eshkim de eki ǵasyrdyń toǵysynda mundai elorda salǵan emes. Million turǵyny bar qalaǵa ainaldy. Sondyqtan maǵan kórsetilgen osyndai senimge zor rizashylyqpen isten alshaqtaýǵa sheshim qabyldadym. Jasqa bailanysty qandai da bir shekteý de bar. Memlekettiń birinshi basshysy barlyq ýaqytta da aqboz atta, alda bolýy tiis jáne energetikasy óte myqty bolýy qajet. Eger ata-anamnan osyndai qýatty energetika darymaǵanda buǵan shydamas ta edim. Sebebi jyldar óte aýyr boldy. Iaǵni, ókinbeimin. Halyq úshin, Qazaqstan úshin durys istedim dep esepteimin», - dedi N.Nazarbaev.
