Foto: "Qazaqstan barysy" respýblikalyq týrniriniń baspasóz qyzmeti
Astana qalasynda Respýblika kúnine orai, qazaq kúresinen ótip jatqan «Qazaqstan barysy-2024» respýblikalyq týrniriniń finalisteri anyqtaldy, dep habarlaidy Kazinform HAA.
Naqtyraq aitsaq, jartylai finalda Shymkent qalasynyń balýany Ersultan Muzapparov ásker barysy Ádil Orazbaevtan ailasyn asyryp, finalǵa shyqty. Ekinshi jupta jartylai finalda Abai oblysynyń qos balýany Saiat Shamshiev pen Erasyl Qajybaev synǵa túsip, nátijesinde Qajybaev qarsylasyn taza utyp finalǵa shyqty.
Osylaisha 42 balýan baq synap jatqan týrirdiń sheshýshi synyna da kelip jetti.
Endi, Ersultan Muzapparov pen Erasyl Qajybaev finalda «Qazaqstan barysy-2024» ataǵyn sarapqa salady.
Bul týrnirde oblystyq jarystardyń qorytyndysy boiynsha iriktelgen elimizdiń eń myqty balýandary baq synap jatyr. Olar elimizdiń 17 oblysy men Respýblikalyq mańyzy bar 3 qala Astana, Almaty jáne Shymkent qalalarynyń sportshylary.
Atalǵan týrnirdiń jeńimpazyna - 15 000 000 teńge berilse, 2-oryn alǵan sportshy - 3 300 000 teńgege ielik etedi. Al 3-orynǵa qol jetkizgen balýan - 1 080 000 teńge kóleminde syiaqy alady.
Sonymen qatar ár balýan ár beldesýde jeńiske jetkeni úshin taǵy 100 000 teńgeden alyp otyrady.
Jalpy «Qazaqstan barysy-2024» respýblikalyq týrnirdiń júlde qory 27 100 000 teńge.
Atalǵan týrnirde jeńiske jetken balýandardyń bapkerleri de syiaqysyz qalmaidy. 3 720 000 teńge sportshylardyń jattyqtyrýshylaryna beriledi.
Atalǵan iri doda 26 qazan kúni «Barys-Arena» stadionynda ótip jatyr.
