Qazaqstan bankteriniń birine kiber shabýyl jalǵasýda. Bul týraly búgin QR Ulttyq qaýipsizdik komiteti tóraǵasynyń orynbasary Dáýlet Erǵojin málim etti, dep habarlaidy Ult.kz tilshisi QazAqparat agenttigine silteme jasap.
«Qazirgi ýaqytta bizdi memlekettik tehnikalyq qyzmetterimiz bul shabýyldarǵa nátijeli toitarys berýde. Shabýyldy keshe tústen keiin baiqadyq jáne odan keiin túni boiy jalǵasty. Kezekshilerimiz ahýalǵa túnimen monitoring júrgizip otyr, barlyq shabýyldarǵa toitarys berildi. Búgingi kúni bizdiń negizgi bankterimizdiń birine shabýyl jalǵasýda. Biz bul jaitty bilip otyrmyz. Qazirdiń ózinde shektedik. Bul serverlerinen shabýyl taralyp jatqan sheteldegi áriptestermen bailanystamyz», - dedi Erǵojin.
Onyń atap ótýinshe, Respýblikalyq memlekettik tehnikalyq qyzmet tek qana óte mańyzdy infraqurylymdardyń kiberkeńistigi qyzmetiniń irkilissiz jumys isteýine ǵana jaýap beredi.
«Búgingi kúni bankter onyń quramyna kirmeidi. Iaǵni, qazirgi ýaqytta biz bankterdi qorǵaý baǵytyndaǵy is-áreketterimizdi Ulttyq bankpen aradaǵy belgili bir kelisim aiasynda júzege asyrýdamyz»,- dedi QR Ulttyq qaýipsizdik komiteti tóraǵasynyń orynbasary.
Aita keteiik, QR UQK tóraǵasynyń orynbasary búgin zań jobalaý qyzmeti máseleleri jónindegi vedomstvoaralyq komissiiasynyń kezekti otyrysynda «Terrorizmge qarsy is-qimyl týraly» QR Zańyna ózgertýler engizý týraly» zań jobasynyń tujyrymdamasyn tanystyrǵan bolatyn.
