Qazaqstan baqyttylyq deńgeii boiynsha Eýraziia ekonomikalyq odaǵynyń elderin, sonyń ishinde Reseidi basyp ozyp, reitingtiń 50-shi pozitsiiasyna ornalasty. Sondai-aq Qazaqstanda er adamdar áielderge qaraǵanda ózderin baqyttyraq sezinetini anyqtaldy. Bul týraly finprom.kz saity habarlady.
QR Ulttyq ekonomika ministrliginiń Statistika komiteti jyl saiyn «Halyqtyń ómir sapasy» taqyrybynda halyq arasynda saýalnama ótkizedi. Ishinara júrgizilgen zertteýge sáikes, respondentterdiń 63,5% óz ómirine qanaǵattanady. Bul rette, aýyl turǵyndary (72,6%) qalada turatyn (58,4%) qazaqstandyqtarǵa qaraǵanda óz ómirlerine anaǵurlym riza. Onymen bir mezgilde, suraqtarǵa jaýap bergender arasynda taǵdyryna qanaǵat etken er adamdar (61,8%) áielderge qaraǵanda (58,5%) kóp bolyp shyqty.
Aita keteiik, 2019 jyly respondentterdiń 60% ómirleriniń sapasyna riza bolsa, 2018 jyly bul kórsetkish 56,5% kórsetti.
Qazaqstan 2020 jyly baqyttylyq deńgeii boiynsha álemdik reitingte (World Happiness Report) 10 orynǵa kóterilip, 153 eldiń arasynda 50-inshi orynǵa turaqtady. Bul rette, EAEO elderi arasynda Qazaqstan birinshi oryn alyp otyr. Odan keiin Resei (73-oryn), Qyrǵyzstan (74-oryn), Belarýs (75-oryn), Armeniia (116-oryn) ornalasqan.
Baqyttylyq deńgeii boiynsha álemdik reiting – bul álem elderi halqynyń baqytty bolý kórsetkishin anyqtaityn halyqaralyq zertteý jobasy. Ony qurý barysynda halyqtyń jan basyna shaqqandaǵy IJÓ deńgeii, ómir súrý uzaqtyǵy, azamattyq bostandyqtardyń bolýy, qaýipsizdikti seziný jáne erteńgi kúnge degen senim deńgeii, otbasylyq turaqtylyq, jumyspen qamtý kepildigi, jemqorlyq kórsetkishi, sondai-aq senimdlik, keńpeiildilik, jomarttyq syndy qoǵamnyń janama qasietteri nazarǵa alynady.
Biylǵy reitingtiń basynda buǵan deiingi jyldardaǵy syndy Finliandiia memleketi tur. Úzdik ondyq qataryna: Daniia, Shveitsariia, Islandiia, Norvegiia, Niderlandy, Shvetsiia, Jańa Zelandiia, Avstriia jáne Liýksembýrg engen.
Statistikaǵa sáikes, ózderin baqytsyz sanaityn halyq Zimbabve, Ońtústik Sýdan jáne Aýǵanstanda turady.
