Qazaqstan Birikken Arab Ámirlikterine 22 tonna salqyndatylǵan etti eksportqa shyǵardy. Bul jaiynda QR Saýda jáne integratsiia ministrliginen málim etti dep habarlaidy "Ult aqparat".
«QR Saýda jáne integratsiia ministrligi Birikken Arab Ámirlikteriniń Elshiligimen birlesip, BAÁ-ge alǵashqy eksporttyq aviaekspress uiymdastyrdy. Aviaekspresspen Abý-Dabige Qazaqstanda óndirilgen salqyndatylǵan 12 tonna qoi eti men 10 tonna siyr eti jóneltildi», - delingen taratylǵan aqparatta.
Vedomstvo málimetinshe, qazaqstandyq et óndirýshiler Birikken Arab Ámirlikteriniń naryǵyn igerýge tyrysyp otyr. Jalpy, ol elde qazaqstandyq ónimder ekologiialyq taza ári dámdik sapasy joǵary bolǵandyqtan baǵalanady. Alaida, logistikanyń kúrdeliligi, sondai-aq Islam Yntymaqtastyǵy Uiymy elderiniń Standarttaý jáne metrologiia institýty qabyldaǵan «halal» standarty negizinde ónimge sáikestikti rastaý rásimderiniń uzaqtyǵy qazirgi ýaqytqa deiin arab naryǵyna shyǵýǵa eleýli kedergi bolyp kelgen.
«Qazaqstandyq et BAÁ-niń Lýlý, Karfýr, Iýnion kooperatsiiasy syndy barlyq iri saýda jelilerine jetkiziledi», ̶ dedi Birikken Arab Ámirlikteriniń QR-daǵy Tótenshe jáne Ókiletti Elshisi Mohammad Ahmad al-Djaber.
Saýda jáne integratsiia ministrliginiń málimetinshe, buǵan deiin qazaqstandyq etti eksportqa tasymaldaý úshin kóp jaǵdaida turaqty jolaýshylar reisteri paidalanylyp kelgen. Al bul joly elimizge Ámirlikterden 13 tonnaǵa jýyq gýmanitarlyq júk ákelgen ushaq paidalanyp otyr.
