Elordada 8 - 9 qyrkúiekte Azyq-túlik qaýipsizdigi jónindegi Islam uiymy Bas Assambleiasynyń (AQIU) tórtinshi sessiiasy ótti, dep habarlaidy Aýyl sharýashylyǵy ministrliginiń baspasóz qyzmeti.
Is-shara «Post-pandemiialyq álemdegi Islam yntymaqtastyǵy uiymynyń azyq-túlik júieleri» taqyrybymen onlain formatta uiymdastyryldy.
Qazaqstan Respýblikasynyń Prezidenti Qasym-Jomart Toqaev islam álemi úshin Azyq-túlik qaýipsizdigi jónindegi Islam uiymynyń mańyzdylyǵyn birneshe ret atap ótken bolatyn. Bas Assambleia qatysýshylaryna arnaǵan alǵy sózinde Memleket basshysy koronavirýs pandemiiasy jáne jahandyq klimattyń ózgerýi jaǵdaiynda azyq-túlik qaýipsizdigi jónindegi uiymnyń róli de erekshe artqanyn atap ótip, qatysýshy elderdi Islam Yntymaqtastyǵy Uiymynyń (IYU) azyq-túlik qaýipsizdigi rezervterin jáne astyq qoryn qurý jónindegi bastamasyn qoldaýǵa shaqyrdy.
«Qazaqstan Islam yntymaqtastyǵy uiymynyń belsendi jáne jaýapty múshesi. Sondai-aq, shetelge 7 ml .tonnaǵa deiin bidai eksporttai otyryp, azyq-túlik bidaiy men undy eksporttaýshy iri ondyqqa kiredi. Jyl saiyn Qazaqstan kómekke muqtaj IYU-na múshe elderge gýmanitarlyq kómek retinde bidai men un jiberedi. Bizdiń tájiribemiz turaqty túrde ósip kele jatqan islam álemindegi azyq - túlik qaýipsizdigi máselelerin sheshýde paidaly bolatynyna senimdimin», - delingen Memleket basshysynyń Bas Assambleia qatysýshylaryna arnalǵan hatynda.
Shara barysynda Túrkiia Respýblikasy Azyq-túlik qaýipsizdigi jónindegi Islam uiymyna tóraǵalyqty Qazaqstanǵa bir jyl merzimge berdi. Aýyl sharýashylyǵy ministri Erbol Qarashókeev óz sózinde IYU azyq-túlik júiesin damytý, bekitilgen baǵdarlamalardy iske asyrýdyń sapaly deńgeiin qamtamasyz etý, uiymnyń gýmanitarlyq baǵdarlamalary, klimattyń ózgerýine bailanysty táýekelder, aýyl sharýashylyǵyndaǵy sý resýrstaryn tiimdi paidalaný máseleleri siiaqty aspektilerdiń mańyzdylyǵyn atap ótip, Qazaqstannyń aldaǵy tóraǵalyq etý kezeńinde berilgen baǵyttar turaqty jalǵastyrylatynan jetkizdi.
«Qazaqstanda 200 mln gektardan astam aýyl sharýashylyǵy jeri bar, bul álemdik resýrstardyń 4% - yn, jaiylymdyq resýrstardyń 180 mln gektardan astamyn quraidy. Qazaqstan Islam yntymaqtastyǵy uiymynyń belsendi ári jaýapty jáne ekologiialyq taza agrarlyq ónimniń iri óndirýshileri men eksporttaýshylarynyń biri bola otyryp, IYU keńistiginde azyq-túlik qaýipsizdigi máselelerin sheshýge óz úlesin qosýǵa daiyn», - dep atap ótti E.Qarashókeev.
Tórtinshi Bas Assambleianyń qorytyndysy boiynsha Azyq-túlik qaýipsizdigi jónindegi Islam uiymy 2031 qararlary men strategiialyq jospary bekitildi. Oǵan sáikes 16 baǵdarlamany júzege asyrý arqyly 5 negizgi baǵyt: basqarý, azyq-túlik daǵdarysyna den qoiý, áleýetti arttyrý, indýstriiany damytý jáne resýrstardy jumyldyrýdy odan ári damytý jáne kúsheitý josparlanǵan.
Taiaýdaǵy 10 jylǵa arnalǵan negizgi maqsattardyń qatarynda - daǵdarys jaǵdailarynda IYU elderin qoldaý úshin azyq-túlik qaýipsizdiginiń rezervterin jáne gýmanitarlyq azyq-túlik kómegi jónindegi baǵdarlamalardy qurý, agrarlyq azyq-túlik ónerkásibiniń básekege qabilettiligin arttyrý, arnaiy jobalar men investitsiialardy qoldaý úshin qarjylyq yntymaqtastyqqa járdemdesý, bio jáne agrotehnologiialardy damytý, klimatqa áser etý, gendik bankterdi damytý jáne «halal» tamaq ónimderiniń ekojúiesi siiaqty aspektilerdi qamtityn qatysýshy elderdiń áleýetin damytý úshin tehnikalyq tájiribeni berý qarastyrylǵan.
Is-sharaǵa Azyq-túlik qaýipsizdigi jónindegi Islam uiymyna múshe 36 memleket jáne Islam yntymaqtastyǵy uiymynyń 56 elinen jalpy 150-den astam qatysýshy qatysty. Olardyń quramynda aýyl sharýashylyǵy ministrleri, halyqaralyq uiymdardyń, IYU jáne onyń institýttarynyń ókilderi, sondai-aq qatysýshy elderdegi azyq-túlik qaýipsizdigi máselelerine jetekshilik etetin basqa da joǵary laýazymdy tulǵalar boldy.
