Qazaqstan The Economist jýrnalynyń azyq-túlik qaýipsizdigi reitinginde álemde 32-orynǵa ie boldy. Bul týraly halyqqa esep berý kezdesýinde QR Aýyl sharýashylyǵy ministri Saparhan Omarov aitty, dep habarlaidy QazAqparat.
«Ótken jyldyń qorytyndysy boiynsha AÓK salasynda barlyq makrokórsetkishter boiynsha ósim bar. Aýyl sharýashylyǵynyń jalpy óniminiń kólemi 5,7 paiyzǵa ulǵaiyp, 6,3 trln teńgege jetti. Bul - Eýraziialyq ekonomikalyq odaq elderi arasyndaǵy eń úlken ósim. Sonymen qatar, Qazaqstanda azyq-túlik óndirisi 4 paiyzǵa ósti», - dedi ministr.
Saparhan Omarovtyń dereginshe, aýyl sharýashylyǵynyń negizgi kapitalyna salynǵan investitsiialar aǵyny 15, tamaq ónimderi óndirisine salynǵan investitsiia 13,5 paiyzǵa ulǵaidy. Nátijesinde, AÓK investitsiialarynyń jalpy kólemi jospardaǵydan 154,2 mlrd teńgege asyp, 677,2 mlrd teńgeni qurady.
«AÓK óndirisiniń ósim kólemi qaita óńdelgen aýyl sharýashylyǵy ónimderi eksportynyń ulǵaiýymen naqtylandy. Ol 2019 jylmen salystyrǵanda 22 paiyzǵa ósip, 1,3 mlrd AQSh dollaryn qurady. AÓK salasynda júrgizilip jatqan saiasattyń tiimdiligin britandyq The Economist jýrnaly ótkizetin Azyq-túlik qaýipsizdiginiń jahandyq reitingi de rastady. Onda Qazaqstan 2020 jyldyń qorytyndysy boiynsha 16 pozitsiiaǵa kóterilip, álemniń 113 eliniń arasynan 32-orynǵa ie boldy», - dedi Saparhan Omarov.
