Memlekettik qyzmetterdi saýsaq izimen alý tetigi 2019 jyldyń qyrkúieginde tolyqtai iske qosylady. Bul týraly búgin Úkimettiń selektorlyq rejimdegi otyrysynda "Azamattarǵa arnalǵan úkimet" memlekettik korporatsiiasy basqarma tóraǵasy Abylaihan Ospanov aitty, dep habarlaidy QazAqparat tilshisi.
"Memlekettik qyzmetterdi alý protsesin jeńildetý úshin biz qyzmet alýshylardyń jeke basyn rastaýdyń jańa mehanizmin iske qostyq. Endi azamattar qyzmetti bet-beinesi nemese saýsaq izderiniń kómegimen ala alady, sonyń arqasynda elektrondy tsifrlyq qoltańba qoldaný nemese jeke kýálikti usyný qajettiligi joǵalady", - dedi ol.
Onyń aitýynsha, bul bazany qarjy, kommertsiialyq qyzmet kórsetý jáne qaýipsizdik salalarynda, sondai-aq ǵimaratqa kirý júiesinde paidalanýǵa bolady.
"Bundaǵy artyqshylyqtar kelesidei: Azamattardyń jeke derekteriniń qorǵalýynyń kúsheiýi; óz betinshe alynatyn qyzmetter sanynyń artýy; qyzmetterdi alý kezinde bógde azamattardyń qatysýyn boldyrmaý", - dedi A.Ospanov.
Basqarma tóraǵasynyń sózine qaraǵanda, ilki joba 2018 jylǵy 12 jeltoqsanynan bastap Astana jáne Almaty qalalarynda iske qosylǵan.
"Al tolyqtai biyl qyrkúiek aiynda iske qosylady dep josparlanýda", - dedi ol.
