Qazaqstan óz azamattaryna álemniń 24 eline vizasyz qydyrý múmkindigin usynyp otyr. QR Syrtqy ister ministrliginiń málimetine silteme jasai otyryp, atalmysh elderdiń tizimin oqyrman nazaryna usynamyz.
Syrtqy ister ministrliginiń málimeti boiynsha, qazirgi tańda 19 memleketpen ulttyq pasport ielerin vizalyq talaptardan bosatý týraly ekijaqty kelisimderge qol qoiylǵan. Olar: Argentina, Armeniia, Ázerbaijan, Belarýs, Birikken Arab Ámirlikteri, Braziliia, Gonkong AÁA, Grýziia, Qyrǵyzstan, Moldova, Mońǵoliia, Ońtústik Koreia, Ózbekstan, Resei, Serbiia, Tájikstan, Túrkiia, Ýkraina jáne Ekvador.
Sondai-aq, qazaqstandyq azamattar úshin birjaqty tártip negizinde 5 memleketpen vizasyz rejim engizilgen.
Ministrliktiń resmi ókili Aibek Smadiiarovtyń aitýynsha, alǵashqy tizimdegi elderdiń azamattary da Qazaqstan aýmaǵyna týrist retinde vizasyz kire alady.
«Al Indoneziia, Kolýmbiia, Kosta-Rika, Malaiziia jáne Filippin elderinde bizdiń eldiń azamattary vizasyz qydyra alǵanymen, atalmysh elderdiń turǵyndary bizge viza arqyly ǵana kiredi», - deidi SIM ókili.
Resmi organnyń habarlaýynsha, ministrliktiń týristik saparmen shyǵýǵa tyiym salynǵan nemese qaýip bar shet elderdiń arnaiy tizimi joq.
«Shet memlekette ishki saiasi jaǵdai shielenisip jatsa nemese tabiǵi jáne tehnogendik sipattaǵy tótenshe jaǵdailar bolǵan kezde qazaqstandyq azamattarǵa ministrlik atalǵan memleketterge shyǵýdan bas tartý týraly usynymdardy der kezinde jariialap otyrady», - delingen resmi aqparatta.
Syrtqy ister ministrligi QR azamattaryna shet elderge shyǵar aldynda baratyn el men onyń saiasi jaǵdaiy týraly qosymsha bilip alýǵa keńes beredi.
