QR Qorǵanys ministrligi Halyqaralyq yntymaqtastyq departamentiniń bastyǵy Oljas Qusaiynov UQShU bitimgerlik missiiasynyń Qazaqstan aýmaǵynda qandai jumys tyndyrǵanyn aitty, dep habarlaidy QazAqparat.
«Oqiǵalardyń qarqyndy órbýine bailanysty, bitimgerlerdiń bólimsheleri elge 6-shy qańtarda kele bastady.
Qysqa merzimde Reseidiń áskeri-kólik aviatsiiasyn paidalana otyryp, eki myńnan astam adam men 250 birlik tehnika jetkizildi.
Sonymen qatar Qazaqstannyń Qarýly Kúshteri bitimgershilik kontingenttiń qaýipsiz kelýin qamtamasyz etti. Áýe shabýylyna qarsy qorǵanys kúshteri Qazaqstan aýmaǵy ústinen áskeri-kólik aviatsiiasynyń ushý qaýipsizdigin qadaǵalady. Desanttyq-shabýyldaý áskerleri Ujymdyq bitimgershilik kúshteriniń negizgi bólimsheleri kelgen Almaty qalasynyń áýejaiyn kúzetýge jáne qorǵaýǵa aldy. Bitimgerlerdiń áskeri tehnika lekteriniń qozǵalysymen ilesip júrý uiymdastyryldy», - dedi ol ortalyq kommýnikatsiialar qyzmetinde ótken brifingide.
Aitýynsha, Ujymdyq bitimgershilik kúshteri shtaby QR Qarý Kúshteri Bas shtabynyń jedel tobymen, Almaty qalasynyń komendatýrasymen, terrorizmge qarsy kúres jónindegi Almaty qalalyq jedel shtabymen únemi aqparat almasyp otyrǵan.
«Ujymdyq bitimgershilik kúshter jedel óristetilip, elimizdiń memlekettik organdarymen kelisim boiynsha olarǵa júktelgen strategiialyq obektilerdi qorǵaý mindetterin oryndaýǵa kiristi.
Kontingentter áýejailardy, áskeri qoimalardy jáne azamattardyń ómirin qamtamasyz etetin basqa da strategiialyq nysandardy qalqalaý jáne olardyń qaýipsizdigin qamtamasyz etý qyzmetterin atqardy.
Bul sharalar terrorizmge qarsy operatsiiany tikelei júrgizý úshin kúshter men quraldardyń edáýir bóligin bosatýǵa múmkindik berip, terroristik belsendiliktiń tutastai tómendeýine yqpal etti», - dedi ministrliktiń Halyqaralyq yntymaqtastyq departament bastyǵy.
