QR syrtqy ister ministri Qairat Ábdirahmanov Qazaqstan tarapynan Aýǵanstanǵa bólingen materialdyq kómekke qatysty túsinikteme berdi, dep habarlaidy Sputnik Qazaqstan tilshisi.
Jaqynda Qazaqstan Aýǵanstanda terrorlyq aktilerden zardap shekkenderge materialdyq kómek kórsetti.
"Bul tusta shamamen 100 myń dollar týraly sóz bolyp otyr. Bul qarajat Qyzyl Krest komitetiniń jelisi boiynsha Aýǵanstan aýmaǵynda terrorlyq aktilerden zardap shekkenderdi ońaltý úshin bólindi", — dedi ministr májilis kýlýarynda.
Atap aitsaq, Qazaqstan tarapynan bólingen qosymsha aqsha Aýǵanstanda terakt saldarynan múgedek bolyp qalǵan azamattarǵa baǵyttalǵan.
Aita ketsek, búgin májiliste Qazaqstan úkimeti men Halyqaralyq Qyzyl Krest komitetiniń arasyndaǵy Qazaqstandaǵy Halyqaralyq Qyzyl Krest komiteti ókildiginiń mártebesi, artyqshylyqtary jáne immýnitetteri týraly kelisimdi ratifikatsiialaý týraly zań jobasy maquldandy.
Ministrdiń aitýynsha, Qazaqstan úkimeti men Qyzyl krest komiteti arasyndaǵy kelisimdi ratifikatsiialaýǵa biýdjetten qarajat qarastyrylmaǵan. Tek erikti jarna ǵana bólinedi.
"Erikti jarna mólsheri 5-15 myń dollardy quraidy. Qyzyl krest komiteti bizdegi bankterde óz esepshotyn ashady, aqshanyń barlyǵy sonda saqtalady. Keiin jumys ulttyq zańnamaǵa sáikes júrgiziledi", — dedi ol.
Maquldanǵan zań jobasy aiasynda Qazaqstanda Qyzyl Krest komitetiniń keńsesi ashylady.
