Eýropalyq komissiia Qazaqstannyń áýe keńistiginde qaýipsizdiktiń jaqsarǵanyn atady, dep habarlaidy "Ult aqparat".
Naýryz aiynda Eýropalyq komissiianyń ushý qaýipsizdigi komiteti Qazaqstannyń aviatsiialyq ákimshiligi men Indýstriia jáne infraqurylymdyq damý ministrligi Azamattyq aviatsiia komitetiniń qyzmettik esebin tyńdaǵan bolatyn. Kezdesýde Qazaqstannyń Aviatsiia ákimshiliginiń bas direktory Piter Griffits pen Azamattyq aviatsiia komitetiniń tóraǵasy Talǵat Lastaev ushý qaýipsizdigin qadaǵalaý jáne sertifikattalǵan aviatasymaldaýshylardyń jaǵdaiy týraly tolyqqandy málimet bergen.
«Sol esepti qorytyndylaǵan Eýropalyq komissiia qazaqstandyq aviakompaniialardy Eýropalyq odaqqa ushýǵa tyiym salynǵan aviatasymaldaýshylar tizimine («qara tizim») engizý úshin negiz joq degen sheshim qabyldady. Eýrokomissiia ókilderiniń Qazaqstandaǵy aviatsiiany retteýshi organdarǵa taǵar mini joq jáne keibir sarapshylar «Bek Eir» ushaǵymen bolǵan áýe apatyna alańdaýshylyq bildirgenimen, «qara tizimge» túsý múmkindigi barynsha azaitylǵanyn eskerdi.
Eske salsaq, 2009 jylǵy tyńdaý qorytyndysy boiynsha Eýrokomissiia qazaqstandyq aviatasymaldaýshylardy «qara tizimge» engizý týraly sheshim qabyldaǵan bolatyn», - dep jazady Azamattyq aviatsiia komitetiniń baspasóz qyzmeti.
Degenmen, Eýropalyq komissiia jaǵdaidyń odan ári damýyna monitoring jasap, baǵalaýdy jalǵastyrady. Osy turǵyda komissiia EASA jáne EO-ǵa múshe memleketterdiń kómegimen Qazaqstanǵa sholý saparyn uiymdastyrmaqshy.
