Jyl saiyn Qazaqstanda jaýyngerlik aviatsiiadaǵy ushaqtar sany artady. Bul týraly QR Qorǵanys ministri Sáken Jasuzaqov málim etti, dep habarlaidy QazAqparat.
«Áýe qorǵanysy kúshin jabdyqtaýǵa sońǵy býyndy «4++» joiǵysh ushaqtary, SI-295 áskeri-kóliktik ushaqtary jetkizildi. Aǵymdaǵy jyly eki jiyntyǵyn alǵannan keiin, biz áskeri-kóliktik aviatsiiany jasaqtaýdy aiaqtaimyz. Áskeri aviatsiiaǵa tek shabýyldaý tikushaqtary ǵana emes, sonymen qatar jaýyngerlik Mi-35 tikushaqtary da tartyla bastady. Tórteýin aldyq jáne taǵy da tórteýi jetkiziledi. 2020 jylǵa qarai osy baǵyttaǵy protsesti aiaqtaityn bolamyz»,-dedi ministr Májilistegi Úkimet saǵatynda.
Budan bólek, S. Jasuzaqov áýe shabýylyna qarsy qorǵanys kúshiniń jaǵdaiy týraly baiandady. Resei tarapynan bes S-300 alyndy, olar jyl sońynda jaýyngerlik kezekshilik tártibine qoiylady.
Sonymen qatar radiotehnikalyq ásker boiynsha keibir máseleler bar kórinedi. Degenmen de otandyq radiolokatsiialyq úsh koordinattyq «Nur» stansalaryn qurý jumystary uiymdastyryldy.
Onyń alǵashqy jiyntyǵy Astanany qamtý úshin ornatyldy, al ekinshisi Qaraǵandyda qoiylyp jatyr. Aldaǵy ýaqytta bul stansalar burynnan paidalanylyp kele jatqan apparattardy almastyratyn bolady.
Sondai-aq ol elordada áýe shabýylyna qarsy qorǵanysqa erekshe nazar aýdarylyp otyrǵandyǵyn atap ótti. Osy rette tómen de ushatyn apparattardy anyqtaityn jabdyqtar ornatylýda.
