Qazaqstan altyn qory boiynsha álemde 16-orynda tur. Bul jaiynda Májilistegi «Aqjol» fraktsiiasynyń depýtattyq saýalyna jaýap bergen Ulttyq bank tóraǵasy Daniiar Aqyshev málim etti, dep habarlaidy QazAqparat tilshisi.
«Qazirgi ýaqytta Ulttyq banktiń altyn-valiýta rezervteriniń qurylymyndaǵy altyn kólemi 42,3 paiyzǵa jetti. Bul tarihi turǵydan eń joǵary shama (altynnyń eń az 7,2 paiyz úlesi 2006 jyly baiqaldy) bolyp tabylady. Qun boiynsha bul kólem 12,9 mlrd AQSh dollaryn, al naqty shamada 323 tonnany quraidy. Dúniejúzilik altyn jónindegi keńestiń derekteri boiynsha Qazaqstan altyn rezervteri boiynsha álemde 16-shy orynda», - dep atap ótedi Daniiar Aqyshev.
Onyń aitýynsha, altyn kólemi 2011 jyldan beri aitarlyqtai ósti. Ol kezde Ulttyq bankke zańnamalyq deńgeide otandyq óndirýshilerden tazartylǵan altyndy basymdyqpen satyp alý quqyǵy berilgen edi.
«Tiisinshe, Ulttyq banktiń naqty altynynyń edáýir kólemi ony geosaiasi táýekelderden qorǵai otyryp, Qazaqstannyń aýmaǵynda saqtalýda. Naqty altyn depozitke ornalastyrýǵa bolatyn allokirlenbegen altynǵa qaraǵanda kiris ákelmeitinin atap ótemin», - dedi ol.
