Foto: oqý-aǵartý ministrligi
Qazaqstan stýdentteri alǵash ret EuroSkills Herning 2025 chempionatynda 7 "Úzdik medalon" jeńip aldy. Bul týraly oqý-aǵartý ministrligi habarlady.
Qazaqstannyń ulttyq quramasy Daniiada ótken IX Eýropalyq kásibi sheberlik chempionatynda buryn-sońdy bolmaǵan jetistikke qol jetkizdi.
Chempionatqa 32 elden 25 jasqa deiingi 600 úzdik jas maman qatysqan.
"Qazaqstandyq kolledj stýdentteri 25 quzyret boiynsha baq synady. Olardyń qatarynda veb-tehnologiialar, mehatronika, CAD injenerlik grafikasy, jelilik ákimshilendirý, grafikalyq dizain, dánekerleý tehnologiiasy, meiramhana servisi, konditerlik is, avtomehanika jáne basqa da baǵyttar bar", - delingen habarlamada.
Jarys qorytyndysy boiynsha ulttyq qurama tómendegi quzyretter boiynsha joǵary nátije kórseten.
Veb-tehnologiialar, Qazaqstannyń Best of Nation – "Úzdik ókili" – Muhametjan Aǵybai (ASTANA POLYTECHNIC joǵary kolledji) atandy.
Mehatronika (toptyq jumys) – Artem Mochinskii (ShQO, Óskemen joǵary politehnikalyq kolledji) jáne Danil Týrapin (Astana q, Joǵary politehnikalyq kolledj).
Grafikalyq dizain – Baǵyjan Qoishybaev (Aqtóbe q, Joǵary politehnikalyq kolledj).
Jelilik jáne júielik ákimshilendirý (toptyq jumys) – Danil Lapenko (Astana q, Joǵary politehnikalyq kolledj túlegi) jáne Gleb Saýlenko (Qostanai obl, Avtomobil kóligi kolledjiniń túlegi).
CAD injenerlik dizain – Baqdaýlet Qýanysh (Atyraý obl, S. Muqashev atyndaǵy politehnikalyq joǵary kolledj).
Ulttyq quramany oqý-aǵartý ministri Ǵani Beisembaev jeńisimen quttyqtady.
"Bul jetistik tehnikalyq jáne kásiptik bilim berý júiesiniń jańa deńgeige kóterilgenin aiǵaqtaidy. Jumysshy mamandyqtar jyly biz qazaqstandyq kolledjderdiń zamanaýi kadr daiarlaý ortalyqtaryna ainalyp kele jatqanyn, al stýdentterimizdiń halyqaralyq arenada bákege qabiletti ekenin kórip otyrmyz. Stýdentterdi, pedagogterdi, sarapshylar men tálimgerlerdi tarihi jeńispen quttyqtaimyn", - dedi ministr.
Aita keteri, EuroSkills – WorldSkills qozǵalysy aiasynda ótkiziletin Eýropadaǵy eń iri jas mamandar chempionaty. Onyń basty maqsaty – kadrlardy daiarlaý salasyndaǵy zamanaýi standarttar men jetistikterdi kórsetý.
Esterińizge sala keteiik, 2023 jyly Qazaqstan 2 medalon jeńip aldy.
