Foto: Aqorda
Búgin Memleket basshysy Qasym-Jomart Toqaev «Qazaqstan – akademiialyq bilim aimaǵy» strategiialyq seriktester forýmynda sóz sóilep, elimizdiń joǵary bilim júiesin halyqaralyq deńgeige kóterý baǵytyndaǵy josparlarymen bólisti, dep habarlaidy Ult.kz.
Prezidenttiń aitýynsha, Ortalyq Aziia men kórshiles elderdegi demografiialyq ósim – Qazaqstan úshin bilim eksportyn damytýǵa jáne sheteldik stýdentterdi tartýǵa zor múmkindik.
“Qazaqstan jahandyq bilim naryǵynyń bir bóligine ainalýdy kózdep otyr. Osy maqsatta álemniń 40 jetekshi ýniversitetimen seriktestik ornatylyp, elimizde sheteldik joǵary oqý oryndarynyń 33 filialy ashyldy. Oqý aǵylshyn, orys, qytai tilderinde júrgiziledi. Bul kóptildilik bilim berýdiń ashyqtyǵy men básekege qabilettiligin arttyrady,” – dedi Prezident.
Sonymen qatar, barlyq sheteldik filialdarda qazaq tili men Qazaqstan tarihy mindetti pán retinde engizilgen. Bul – sheteldik stýdentterdiń ulttyq mádeniet pen qundylyqtardy tereń túsinýine múmkindik beredi.
🔹 Qazirgi ýaqytta elimizde 31 myńnan astam sheteldik stýdent bilim alýda – bul rekordtyq kórsetkish.
🔹 2029 jylǵa qarai olardyń sanyn 100 myńǵa deiin arttyrý josparlanǵan.
Osy maqsatqa jetý úshin:
-
viza rásimdeý júiesi jeńildetiledi,
-
sheteldik stýdentterge qolaily jaǵdai jasalady,
-
úzdik túlekterdiń Qazaqstanda qalyp, eńbek etýine múmkindik beretin baǵdarlama iske qosylady.
Prezident sózinde injenerlik jáne IT baǵytyndaǵy bilimdi damytý erekshe nazarda ekenin atap ótti.
“Qytaidyń bastamasymen Qazaqstanda úsh Lý Ban sheberhanasy ashyldy. Sondai-aq iadrolyq energetika salasy úshin mamandar daiarlaý mańyzdy. MIFI ýniversitetimen osy baǵytta seriktestik ornatamyz,” – dedi Qasym-Jomart Toqaev.
Sonymen birge Memleket basshysy Qozybaev ýniversiteti men Arizona ýniversitetiniń birlesken jobasyn mysalǵa keltirip, kúkirtti innovatsiialyq polimerge ainaldyratyn tehnologiianyń himiia ónerkásibi men ekologiiaǵa zor úles qosatynyn aitty.
“Bizdiń basty maqsat – bilim men ǵylymdy ekonomikanyń naqty sektorymen tikelei bailanystyrý,” – dedi Prezident.
