Qazaqstan AQSh-tyń Áielderdiń jahandyq damýy men órkendeýi jónindegi bastamasyn qoldady, dep habarlaidy "Ult aqparat".
2021 jylǵy 8 qańtarda QR Prezidenti janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lazzat Ramazanova AQSh-tyń Áielderdiń jahandyq máseleleri jónindegi memlekettik departamentiniń erekshe tapsyrmalar jónindegi elshisi Kelli Ekels Karri hanymmen kezdesti.
Kezdesýde AQSh úkimetiniń «Áielderdiń jahandyq damýy men gúldenýi» (WGDP) bastamasy sheńberinde Qazaqstan men AQSh-tyń áielderdiń ekonomikalyq quqyqtaryn ilgeriletý jónindegi yntymaqtastyq máseleleri talqylandy.
Qazaqstan bul bastamaǵa 2020 jylǵy 23 qazanda resmi túrde qosylyp, BUU-ǵa múshe 31 elden turatyn negizgi toptyń múshesi boldy.
WGDP bastamasy damýshy elderdegi 50 mln áieldiń ekonomikalyq quqyqtary men múmkindikterin áielderdiń ekonomikalyq ómirge qatysýy úshin quqyqtyq kedergilerdi joiý jolymen 2025 jylǵa deiin keńeitýge baǵyttalǵan.
Bul álemdik ekonomikanyń ósýin yntalandyratyn, sondai-aq onyń turaqtylyǵyn nyǵaitatyn bolady.
Lazzat Ramazanovanyń pikirinshe, yntymaqtastyqtyń alǵashqy qadamy áielderdi kásipkerlik daǵdylarǵa, kóshbasshylyqqa oqytý jáne áielderdiń ekonomikalyq belsendiligi úshin kedergilerdi joiý boiynsha seminarlar ótkizý bolýy múmkin.
«Áielder úshin qoljetimdi nesielik jelilerdi qamtamasyz etý, onlain-saýda platformalaryn jáne kásipker áielderdiń álemdik ozyq praktikalarynyń biryńǵai bazasyn qurý máselelerin pysyqtaý ózekti ári mańyzdy qadam bolmaq», - dep atap ótti kezdesýde QR Prezidentiniń janyndaǵy Áielder isteri jáne otbasylyq-demografiialyq saiasat jónindegi ulttyq komissiianyń tóraiymy Lazzat Ramazanova.
Ulttyq komissiia basshysy búginde qazaqstandyq áielder shaǵyn jáne orta bizneste jetekshi orynǵa ie ekenin atap ótti. Olar 500 myńnan astam kompaniia basqarady, bul eldiń belsendi jumys isteitin kásipkerleriniń jalpy sanynyń 43% quraidy.
