2020 jyldyń 12 aiynyń qorytyndysy boiynsha farmatsevtika ónerkásibindegi óndiris kólemi 47% - ǵa ósti, dep habarlaidy "Ult aqparat" QR Indýstriia jáne infraqurylymdyq damý ministrliginiń Telegram kanalyna silteme jasap.
Buǵan otandyq kásiporyndarda shyǵarylatyn ónim kóleminiń ulǵaiýy sebep boldy. Mysaly, «Himfarm» AQ shyǵaratyn ónim kólemin 2 esege arttyrdy. Budan bólek, kompaniia sońǵy 2 jylda eksport kólemin 2,5 esege arttyrdy. Búgingi tańda kásiporynnyń dárilik zattary Ortalyq Aziia jáne EAEO naryqtarynda keńinen suranysqa ie. Ónimder Tájikstan, Túrikmenstan, Mońǵoliia, Resei jáne Qyrǵyzstan siiaqty elderge eksporttalady.
Sonymen qatar biyl Ózbekstan naryǵyn igere otyryp, eksportty eki esege arttyrý josparlanǵan. Budan bólek, mańyzdy bastamalardyń biri Eýropalyq odaqtyń dárilik naryǵyna shyǵý kózdelgen. Osylaisha, 2023 jylǵa qarai eksport kólemin 4 esege, iaǵni 16 mlrd. teńgege deiin ulǵaitý josparlanyp otyr.
Búginde kásiporynnyń 11 óndiristik jelide óndiriletin 9 túrli nysandaǵy 120-dan astam dárilik zattardyń ataýlary bar, al bul otandyq óndirýshiniń onnan astam emdik toptarda usynylǵanynyń kórsetkishi.
Sondai-aq, «Dolce-Pharm» farmatsevtikalyq kompaniiasy da joǵary kórsetkishterge qol jetkizdi. Kásiporyn shyǵarylatyn ónim kólemin 5 esege arttyrdy. Kásiporyn 1998 jyly quryldy jáne 23 jyl ishinde bir ret qoldanylatyn MMB óndirý salasynda ulttyq kóshbasshy atandy. Búginde kompaniia túrli meditsinalyq ónimderdiń 200-ge jýyq túrin shyǵarady. Óndiristik keshen Almaty oblysynda, Yntymaq aýylynda ornalasqan, onda 450 adam eńbek etedi. Zaýytta 6 óndiristik tseh bar.
