Búgin «Qazaqy terminderdi halyq jasaidy» respýblikalyq baiqaýynyń jeńimpazdary marapattaldy, dep habarlaidy "Ult aqparat".
QR Mádeniet jáne sport ministrligi Til saiasaty komitetiniń tapsyrmasymen «Til-Qazyna» ulttyq ǵylymi-praktikalyq ortalyǵy 1-18 sáýir aralyǵynda «Qazaqy terminderdi halyq jasaidy» respýblikalyq baiqaýyn ótkizdi.
Qazaqstan Respýblikasyndaǵy til saiasatyn iske asyrýdyń 2020-2025 jyldarǵa arnalǵan memlekettik baǵdarlamasyn iske asyrý, qazaq tilindegi terminderdiń úles salmaǵyn arttyrýǵa úles qosý maqsatynda uiymdastyrylǵan baiqaýǵa 14 talapker qatysty.
Baiqaýǵa qatysýshylar birinshi kezeńde (1-5 sáýir aralyǵy) ózderi jasaǵan 5-10 termindi usyndy. Saitta, áleýmettik jelide kópshiliktiń daýys berýi jáne qazylar alqasynyń sheshimimen 5 baiqaý qatysýshysy kelesi kezeńge ótti. Ekinshi ainalymda (7-12 sáýir aralyǵy) qatysýshylarǵa 10 shet tildik terminniń qazaq tilindegi sátti aýdarmasyn jasaý tapsyryldy. Bul kezeń qorytyndysy boiynsha Serik Erǵali, Nurlan Shúlenbaev, Aqylbek Shaiahmet qorytyndy kezeńge joldama aldy. Úshinshi kezeńde (13-18 sáýir aralyǵy) qatysýshylar mátin ishindegi shet tildik salalyq terminderdiń qazaqsha balamasyn jasady.
Baiqaý shartyna sai qazylar sheshimimen 362 upai jinaǵan Aqylbek Shaiahmet III oryndy iemdedi. Al II oryndy 367 upaimen Nurlan Shúlenbaev enshilese, I orynǵa 370 upai alǵan Serik Erǵali laiyq tanyldy.
Onlain marapattaý rásimine QR Mádeniet jáne sport ministrliginiń vitse-ministri N.Dáýeshov qatysyp, jeńimpazdarǵa quttyqtady.
«Elimizdegi tótenshe jaǵdaiǵa bailanysty onlain uiymdastyrylǵan baiqaýǵa qatysýshylar termin sózderdiń maǵynasyna úńilip, utymdy ulttyq ataýlar usyna bildi. Talapkerlerdiń termin tabiǵatyn túsinip, sózjasam, terminjasam tásilderin durys paidalanǵandyqtaryn mamandar jaqsy baǵalady. Sondyqtan osyndai bilim men biliktilikti qajet etetin baiqaýǵa qatysyp, úzdik nátijege jetken jeńimpazdardy quttyqtaimyn. Aldaǵy ýaqytta da ulttyq terminqordyń damýyna úlesterińizdi qosatyndyqtaryńyzǵa senimdimin», - dedi ol.
Shara barysynda baiqaýdyń ekinshi kezeńinde belsendilik tanytqan talapkerlerge de ministrdiń arnaiy alǵyshaty tabystaldy.
