Sońǵy tórt jyl ishinde Qazaqstannyń iri mys óndirýshisi Nursultan Nazarbaev qurǵan kommertsiialyq emes uiymdar úshin demeýshi rólin atqaryp kelgen. Osy kezeńde kompaniia eks-prezidenttiń qorlaryna 79,4 mlrd teńge aýdarǵan, dep habarlaidy Ulysmedia.kz Protenge Telegram-kanalyna silteme jasap.
"Qazaqmys" Nazarbaevtyń qorlaryna eń kóp somany 2018 jyly aýdarǵan – 32 mlrd teńge. 2019 jyly demeýshilik kómek 12 mlrd teńgege deiin qysqarypty, biraq 2020 jyly qaitadan 29,2 mlrd teńgege deiin ósti. 2021 jyly kompaniia eks-prezidenttiń qorlaryna 6,2 mlrd teńge aýdarǵan. Barlyq jaǵdailarda bul shyǵyndarǵa "áleýmettik salany qoldaý" degen aidar taǵylǵan.
2018 jyldan 2020 jylǵa deiin "Qazaqmys" qarajaty jalǵyz alýshyǵa – "Qazaqstan Respýblikasynyń Tuńǵysh Prezidenti - Elbasy Qory" JQ aýdarylǵan. Alaida, 2021 jyly atalmysh qor óz jumysyn toqtatqannan keiin, onyń ornyna basqa da retsipientter paida bolǵan. Biraq olar týraly aqparat "Qazaqstan Respýblikasy Tuńǵysh Prezidentiniń qorlary" degen ataýmen jasyrylǵan.
Elimizdegi táýelsiz aqparat quraldarynyń zertteýinshe, Nursultan Nazarbaev tórt qordyń quryltaishysy: "Nazarbaev qory", "Nursultan Nazarbaev qory", "Demeý qory", "Elbasy qory". Qaiyrymdylyqtan bólek, olar milliardtaǵan dollarlyq aktivterdi basqarýmen ainalysady. Resmi túrde olar Nazarbaevqa tiesili emes, biraq qorlardyń negizin qalaýshy retinde olar onyń baqylaýynda.
"Qazaqmys" tobynyń sońǵy benefitsiarlary Vladimir Kim (70%) jáne Edýard Ogai (30%). Vladimir Kim Forbes reitinginde $5 mlrd jaǵdaimen "Qazaqstannyń 50 eń bai biznesmeni – 2022" reitinginde birinshi oryn alady, Edýard Ogai – $583 mln jaǵdaimen on tórtinshi oryn.
