Ózbekstandaǵy Qazaqstan jyly aiasynda «Japon kúzi» festivaline orai Qazaqstan, Ózbekstan jáne Japoniianyń belgili ártisteri birlesip Tashkentte kontsert ótkizdi, dep habarlaidy "Ult aqparat" «Qazaqkontsert» memlekettik kontserttik uiymynyń baspasóz qyzmetine silteme jasap.
«Japon kúzi» halyqaralyq óner festivali 2011 jyldan bastap ótkizilip keledi. Jobanyń qatysýshylary – kúnshyǵys eliniń dástúrli, klassika, djaz mýzykalarynyń tanymal juldyzdary, Qazaqstan jáne Ózbekstan óner maitalmandary. Festival uiymdastyrýshylary – «Degdar» gýmanitarlyq qory men JTI kompaniiasy.
Festival shymyldyǵyn ashqan alǵashqy kontsert anshlagpen ótti. Jańa kontserttik baǵdarlama ózbekstandyq ónersúier qaýymnyń joǵary baǵasyn alyp, kontsertke barlyq biletter tegin berilgendikten, joba ártúrli áleýmettik toptardy qamtydy.
Japondyq mýzykalyq ónerdi Keiko Inoýe, Sakita Hadjime, Iamashita Kenji syndy belgili mýzykanttar usyndy. Olardyń úzdik týyndylary tek kúnshyǵys eline ǵana emes, barsha álemge tanymal. Japondyq kompozitor, mýzykant Sakita Hadjime «mýzykalyq ara» dep atalatyn erekshe mýzykalyq aspapta oryndaý sheberligimen tamsandyrdy. Sirek kezdesetin ári erekshe tańǵajaiyp ún shyǵaratyn aspapta oinaityn mýzykanttar álemde kóp emes. Sakita Hadjime álemde alǵashqylardyń biri bolyp mýzykalyq ara aspabymen oryndalatyn kompozitsiialardy jazdy. Kontsertteri álemniń úzdik sahnalarynda ótetin japondyq pianist Iamashita Kenji men organist Keiko Inoýe óneri de kórermenniń ystyq yqylasyna bólendi.
Qazaqstannyń ulttyq mýzyka ónerin «Qazaqkontsert» memlekettik kontserttik uiymynyń «Astana sazy» etno-folklorlyq ansambli usyndy. Elimizdiń úzdik etno-folklorlyq ansamblderdiń biri qazaq ulttyq mýzykalyq aspaptarymen óner kórsetip, tyńdarmannyń zor qoshemetine ie boldy. Buǵan qosa, ónersúier qaýym ózbekstandyq «Registan» toby usynǵan ózbek ulttyq mýzykasyn tyńdai aldy. Kontsertti belgili qazaqstandyq kinoaktrisa Gýlnar Dýsmatova júrgizdi.
Kesh sońynda barlyq ártister «Japon kúzi» festivaliniń kórkemdik jetekshisi, ataqty maestro Timýr Ýrmancheevpen birge S.Iagisavanyń «Erteńgi kún» kompozitsiiasyn oryndady. «Degdar» gýmanitarlyq qorynyń direktory Laýra Ahmetovanyń aitýynsha, úsh eldiń óner maitalmandaryn bir sahnada toǵystyrǵan festivaldiń basty maqsaty – kórermenderdi japon mýzykasymen, mádenietimen tanystyryp, elder arasyndaǵy mádeni yntymaqtastyqty nyǵaitý.
«Búgin sahnada jas talanttar men ataqty ónerpazdar birge óner kórsetip, ózara qundy tájiribe almasýǵa keremet múmkindik aldy. Kórermender artisterge ystyq yqylastaryn bildirip, shynaiy iltipattaryn kórsetti. Halyqaralyq kelisim men beibitshilikti mýzyka arqyly nyǵaitýda «Japon kúzi» festivaliniń róli zor», - dedi Laýra Ahmetova.
«Japon kúzi» festivali 26 qyrkúiek kúni Bishkek qalasynda jalǵasady.
Festivaldiń jabylý saltanaty 27 qyrkúiekte Almaty qalasynda ótpek. Almatylyqtar japon mýzykasymen qatar, Kúnshyǵys eliniń úzdik kinotýyndylaryn tamashalai alady. Filmder 28 qyrkúiek pen 2 qazan aralyǵynda «Tsezar» kinoteatrynda kórsetiledi. «Japon kúzi» festivali aiasynda barlyq is-sharalarǵa kirý tegin.
