Búgin QR Parlamenti Májilisinde «Kinematografiia týraly» Qazaqstan Respýblikasy Zańy jobasynyń birinshi oqylymynda baiandama jasaǵan QR Mádeniet jáne sport ministri Arystanbek Muhamediuly «Qazaqfilm» kinostýdiiasynyń tehnikalyq jabdyqtalýy tómen ekenin málimdedi, dep habarlaidy Baq.kz tilshisi.
«Siz buqaralyq aqparat quraldaryna bergen suhbattaryńyzda «Astanafilm» atty jańa kinostýdiia qurylatynyn jii aityp júrsiz. Árine, elordada kinoóndirýshi qýatty kompaniia jumys jasaityny qýantarlyq jait. Alaida, bizde ónimdiligi joǵary «Qazaqfilm» jáne 35 jýyq basqa da jekemenshik kinostýdiia bar ekenin esepke ala otyryp, jańa qurylǵan kinostýdiia jumysy turalap qalady degen qaýip joq pa?» - dep saýal joldaǵan bolatyn depýtat Aizada Qurmanova.
Depýtat suraǵyna jaýap bergen Arystanbek Muhamediuly «Astanafilm» kinostýdiiasynyń qurylýy ýaqyt talaby ekenin aitty.
«Bul - memleket basshysynyń tapsyrmasy. Qazir biz ekonomikalyq negizdemesin ázirlep jatyrmyz. Jalpy, bizge ekinshi kinostýdiia salý qajettiligi joǵary. Vengriia, Chehiia sekildi shaǵyn memleketterdiń ózinde birneshe kinostýdiia bar. Mysal retinde, «Mosfilm» qazir memleketten bir tiyn da talap etpeitin, kómek suramaityn táýelsiz mekemege ainalǵan. Kerisinshe, onyń tabysy joǵary. Ol kino qyzmetin paidaly qurýdyń úlgisi bolyp tabylady. Sol siiaqty, «Lenfilmniń» de júktemesi joǵary. Biz otandyq týyndylardy shyǵarý, sheteldik kinostýdiialardy tartýdy alǵa maqsat etip otyrsaq, onda «Qazaqfilm» bul júktemeni júzege asyra almaýy múmkin», - dedi ministr.
Muhamediuly «Qazaqfilm» kionstýdiiasynyń tehnikalyq jabdyqtalýy da qazirgi zamanǵa sai emestigin atap ótti.
«Qazaqfilmniń tehnikalyq jabdyqtalýy joǵary emes. Bizdiń kóptegen kinoóndirýshiler, klip nemese televiziialyq jobalardy túsiretin mamandar tehnikalyq qamsyzdandyrý úshin shetelge barady. Mysaly, Máskeýge, Tashkentke. Sebebi, olardyń tehnikalyq jabdyqtalýy joǵary. Sol sebepti, biz Astanafilmniń tezirek qalyptasýyna múddelimiz. Árine, «Qazaqfilm» shette qalyp qalady ma degen qaýip bar. Alaida, bizdiń josparymyz boiynsha atalǵan kinostýdiia erkin ekonomikalyq aýmaqqa ainalsa, onyń tabysy da, jumysy da joǵary deńgeide bolady», - dedi vedomstvo basshysy.
Eske sala ketsek, QR Parlamenti Májilisinde «Kinematografiia týraly» Qazaqstan Respýblikasy Zańy jobasynyń birinshi oqylymynda palata tóraǵasy Nurlan Nyǵmatýlin eldegi filmderge «ulttyq» mártebe berý barysynda suryptaý belgilerine qatysty pikir bildirdi. Ol qazaqstandyq filmderdiń barlyǵyn saqtaý qajettiligi bar ekenin aitty jáne otandyq kinoteatrlardyń jumysyn baqylaýǵa alý kerektigin jetkizdi.
