QR Mádeniet jáne sport ministri Arystanbek Muhamediuly «Astanafilm» qurylatynyn, sondai-aq «Qazaqfilm» aýmaǵynda erkin ekonomikalyq aimaq bolatynyn málim etti. Bul týraly vedomstvo basshysy feisbýktaǵy paraqshasynda jazdy, dep habarlaidy "Ult aqparat".
«Elbasymyz «Kinematografiia týraly» Qazaqstan Respýblikasy Zańyna qol qoiǵany barshamyzǵa belgili. Bul aýqymdy qujat kinematografiia salasynda quqyqtyq negiz ornatýǵa baǵyttalǵan. Zań jobasy úsh jyl boiy daiyndalyp, jasalyp, endi bekitildi. Bul kino salasy úshin mańyzdy, iaǵni ulttyq kino óndirýshini qoldaý, ulttyq kinony prokatta shyǵarý, qazaqstandyq kinony álemdik kino naryǵyna belsendi túrde shyǵarýǵa baǵyttalǵan osy sala úshin óte mańyzdy zań. Zań týraly keńirek aitqym kelip otyr», - dep toqtaldy ministr.
Onyń sózine qaraǵanda, elimizdiń kinokórsetilimindegi barlyq filmderdi qazaq tiline dýbliaj jasaý, ne sýbtitr berý, nemese kadrdan tys aýdarmany qamtamasyz etý - qazaqstandyqtardyń kópten kútken normasy. Aýdarma kórsetilim iesiniń, distribiýtor esebinen jasalatyn bolady jáne tusaýkeser merzimine áser etpeýi kerek. Aýdarma túpnusqadan nemese reseilik naryq úshin orys tiline tárjimalanǵan nusqadan jasalatyn bolady, muny kórsetilim iesi ózi sheshedi. Kórsetilimi shekteýli filmder ǵana bul erejeden tys bolady. Ulttyq filmderdiń kórsetilimine kelsek, olar qazaq tilinde bolady, basqa tilde qajettilik týyndaǵan jaǵdaida ǵana kórsetiledi.
«Qytai men AQSh-ta kórsetiletin filmderdiń bári aýditoriia tilindegi sýbtitrlermen qamtamasyz etiledi. Bul - eń ońtaily jáne pármendi mehanizmderdiń biri. Qazaqstaǵa jylyna 300-den astam film ákelinedi jáne olar qazaq tilindegi nusqasyz kórsetiletin. Munyń ártúrli sebepteri bar, sonyń biri - quqyq ielenýshi úshin kásibi dýbliaj jasaýǵa jumsalǵan qarjy elimizdegi kórsetilimnen túsken paidadan asyp ketýi múmkin. Sonymen qatar, zańda filmderdi jasqa qarai jiktep, soǵan sáikes kategoriia berilýin, filmderdi júielep, esepke alyp, monitoring júrgizetin birińǵai avtomattyq aqparattyq júie qurý qarastyrylǵan», - dedi A. Muhamediuly.
Atap aitqanda, kino óndirisimen ainalysatyn elderdiń ozat tájiribesine súiene otyryp, Ulttyq kinony qoldaý memlekettik ortalyǵyn qurý júiesi qarastyryldy. Zań kinematografiiany memleket tarapynan qarjylai qoldaityn operator bolyp tabylatyn Ulttyq kinony qoldaý memlekettik ortalyǵy jumysynyń quqyqtyq negizin aiqyndaidy. Ulttyq kinony qarjylandyrýdyń jańa modeli iske asady. Iri kinoóndirýshilerdi qoldaý jáne investorlardy tartý maqsatynda sýbsidiia tóleý, kinematografiia salasynda salyq jeńildikteri, kino qyzmetin esepke alý jáne monitoring jasaý avtomattyq aqparattyq biryńǵai júie qurý, kinokollektsiialardy tsifrlandyrý sharalary qarastyrylǵan.
«Qazaqstan Úkimeti janynan ulttyq filmderdi memleket tarapynan qarjylai qoldaý týraly usynystar men usynymdar máselesimen ainalysatyn konsýltativtik-keńesshi organ - Ulttyq filmderdi memleket tarapynan qarjylai qoldaý máseleleri boiynsha mekemearalyq komissiia qurylady. Elbasymyzdyń tapsyrýymen «Astanafilm» jáne «Qazaqfilm» territoriiasynda erkin ekonomikalyq aimaq qurý máselesi qarastyryldy. Jańalyqtar osyndai! Biz bárimiz Elbasymyzdyń Zańǵa qol qoiýyn asyǵa kúttik. Kinematografiiamyzdyń damýynda sheshýshi kezeń bolyp tabylatyn Táýelsiz Qazaqstan tarihyndaǵy «Kinematografiia týraly» tuńǵysh zań qabyldanýymen barshańyzdy quttyqtaimyn!», - dep jazdy Arystanbek Muhamediuly.
Aita keteiik, biyl qańtardyń basynda Memleket basshysy Nursultan Nazarbaev kinematografiia salasynda quqyqtyq negizdemelerdi belgileýge baǵyttalǵan «Kinematografiia týraly» Qazaqstan Respýblikasynyń Zańyna qol qoidy.
