Búgin elordadaǵy Qalamgerler alleiasynda ornalasqan «Alash qairatkerleri» eskertkishine gúl shoqtary qoiyldy. Osy saltanatty rásim Ahmet Baitursynulynyń 150 jyldyq mereitoiyn merekeleýge arnalyp uiymdastyryldy, dep habarlaidy QazAqparat tilshisi.
Bul rásimge QR Memlekettik hatshysy Erlan Qarin, Nur-Sultan qalasynyń ákimi Altai Kólginov, ziialy qaýym ókilderi, Qazaqstan Jazýshylar odaǵynyń tóraǵasy Ulyqbek Esdáýlet, L.N. Gýmilev atyndaǵy Eýraziia ulttyq ýniversitetiniń rektory Erlan Sydyqov qatysty.
Aita keteiik, alleia mańynda shaǵyn kitaphana ornalasqan, onda A. Baitursynulynyń eńbekteri jáne basqa da qazaq jazýshylarynyń shyǵarmaly kópshilik nazaryna usynyldy.
«Ortalyqtandyrylǵan kitaphanalar júiesi Ahmet Baitursynulynyń 150 jyldyq mereitoiyna orai birqatar is-sharalardy josparlady. Bul rette kórmeler, konferentsiialar, mektep oqýshylary arasynda shyǵarma jazý eskerilgen. Búgin «Alash qairatkerleri» eskertkishine gúlshoqtaryn qoiý rásimine qatystyq. Sonymen qatar qazaq ziialy qaýymy eńbekteriniń kórmesin de uiymdastyrdyq. Bizdiń kitaphana ótken jyly ashylǵan edi. Jalpy bizde qala boiynsha 18 kitaphana qamtylǵan. Búgingi kórmede túrli kitaphanadan jetkizilgen shyǵarmalar men kitaptardy kórýge bolady», - dedi Nur-Sultan qalalyq ortalyqtandyrylǵan kitaphanalar júiesiniń direktory Gúlbadan Mádibaeva.
Budan buryn habarlanǵandai, elordada Ahmet Baitursynulynyń 150 jyldyǵyna arnalǵan halyqaralyq ǵylymi-praktikalyq konferentsiia bastaldy.
«Halqymyz óziniń tarihynda erekshe oryny bar eki tulǵany «Ult ustazy» dep ardaqtaǵan. Aldymen, árine, uly Abaidy aitamyz. Odan keiin Ahmet Baitursynulynyń esimi atalady. Alash kósemi, qazaqtyń birtýar perzenti Ahmet Baitursynulynyń týǵanyna biyl 150 jyl tolyp otyr. Bul mereitoidy IýNESKO deńgeiinde atap ótemiz. Táýelsizdik ultymyzdyń jadyn jańǵyrtyp, tarihi tamyrymyzdan qaitadan nár alýymyzǵa jol ashty. Bul rette ult ustazynyń eńbegin zerdelep, ony mol murasyn urpaq sanasyna sińirý barshamyzǵa ortaq mindet», - dedi Memlekettik hatshy Qarin.
