Qazaqstandyq jazýshy Sáýle Dosjannyń aǵylshyn tilinde jaryq kórgen novellalar jinaǵy 2019 jylǵy «The Man Booker International»(London) syilyǵyna úmitkerler tizimine endi.
2018 jyldyń qazan aiynyń basynda «Hertfordshire Press» britandyq baspa úii Sáýle Dosjannyń «The tragedy of a bastard» jáne «My own strange heart» atty úzdik novellalary engen proza jinaǵynyń aǵylshyn tilindegi nusqasyn Halyqaralyq «Býker» ádebi syilyǵyna usynǵan bolatyn.
Jazýshynyń buryn eshqaida jaryq kórmegen «The tragedy of a bastard» («Kórdemsheniń qasireti») hikaiaty britandyq retsenzentter tarapynan jaqsy pikirge ie bolǵan. Tanymal ádebi synshy Kerolain Ýolton «Our dear ancestors said honour is more valuable than life» («Bizdiń qasietti babalarymyz ómirden de qymbat - ar ekenin aityp ótken») retsenziiasynda «Kórdemsheniń qasireti» hikaiatynyń ideiasy tereń ekenin atap ótedi. Hikaiat jeti atadan qan aralastyrmaý saltyn ustanyp kelgen tekti halyq urpaqtarynyń usaqtalyp, azyp bara jatqany týraly ult taǵdyryna qatysty úlken problemany kóteredi.
Sáýle Dosjan – jazýshy, aqyn, jýrnalist, birneshe ádebi syilyqtyń laýreaty. Sonyń ishinde, jazýshynyń aǵylshyn tiline aýdarylǵan «Ógei júrek» shyǵarmasy 2017 jyly Shvetsiiada ótken Ashyq Evraziialyq Ádebi konkýrsynda «Proza» janry boiynsha júldeli III oryndy ielengen.
Jazýshynyń shyǵarmalar jinaǵyn aǵylshyn tiline Elden Sarybai tárjimalady.
Elden Sarybai «Pero» jeke qorynyń negizin qalaýshy hám uiymdastyrýshysy, aqyn-aýdarmashy, saiasattanýshy. 1989 jyly Almaty qalasynda týǵan, London ýniversitetinde bilim alǵan.
Bul asa abyroily ádebi syilyqtyń short-paraǵyna ilingen jeti úmitkerdiń árqaisysy 1000 fýnt kóleminde syiaqy alady.
Al jeńimpazǵa 50 myń fýnt beriledi. Bul soma avtor men aýdarmashyǵa teń bólinedi.
