«Malefisenta: Túnek ámirshisi» filminiń qazaq tilindegi nusqasy kinoprokatqa shyqty, dep habarlaidy QazAqparat tilshisi «Nur Otan» partiiasynyń baspasóz qyzmetine silteme jasap.
Film «Bolashaq» korporativtik qory jáne «Meloman» kompaniiasynyń bastamasymen, «Nur Otan» partiiasynyń qoldaýymen «Ózińnen basta» jobasy aiasynda dýbliajdalǵan. Film dýbliajynyń demeýshisi – Eýraziialyq Top (ERG).
«1993 jyldan bastap Elbasy jarlyǵymen «Bolashaq» baǵdarlamasy júzege asyp keledi. Baǵdarlamanyń arqasynda qarapaiym otbasynan shyqqan kóptegen jasqa shet elderdegi aldyńǵy qatarly oqý oryndarynda bilim alýǵa múmkindik jasaldy. Osyndai aǵylshyn, nemis, frantsýz jáne taǵy da basqa tilderdi meńgergen jastar halqyńa qyzmet etemin deseń aldymen óz ana tilińdi bilip, ulttyq salt-dástúr men mádenietti boiǵa sińirý kerek ekenin jaqsy túsindi. Sondyqtan da «Bolashaqpen» oqyǵan bir top jastyń basty maqsaty - elge oralǵan soń ártúrli salada qolymyzdan kelgenshe elge qyzmet etý boldy. Bul joba osyndai igi oidan týdy», – dedi «Nur Otan» partiiasy tóraǵasynyń birinshi orynbasary Baýyrjan Baibek elordada ótken filmniń tanystyrylymynda.
Gollivýd filmderin qazaq tiline dýbliajdaý – bul birinshi kezekte árbir qazaqstandyqtyń qazaq tilindegi sapaly kontentke qol jetkizý quqyǵy. Al Gollivýdtyń tanymal kino týyndylary elimizde 2011 jyldan bastap qazaqsha sóiletip kele jatqan «Ózińnen basta» jobasy kommertsiialyq maqsatty kózdemeidi.
Aita keteiik, filmdi dýbliajdaýǵa jobanyń demeýshisi bolyp otyrǵan Eurasian Resources Group-tyń qyzmetkerleri de qatysqan.
«Malefisenta» mistikalyq blokbasterinde joba aiasynda Malefisentanyń rólin dybystaýǵa airyqsha quqyqtar alynǵan. Máselen, Andjelina Djoli qazaqstandyq teatr jáne kino aktrisasy Gúlnaz Áýesbaidy óziniń keiipkerin dybystaýǵa jeke bekitti. Qazaq dýbliajynyń rejisseri Nazerke Lespekqyzy. Film kastingine Nur-Sultan, Almaty jáne Qaraǵandy qalalarynan 40-tan astam akterler qatysqan.
2019 jyly qarasha aiynda taǵy bir qazaq tiline dýbliajdalǵan «Muzdy ólke 2» filminiń tusaýkeseri kútip tur.
«Ózińnen basta» jobasyn aiasynda qazaq tiline barlyǵy 32 gollivýdtyq týyndy dýbliajdalsa, olardyń ishinde «Kólikter 2», «Kek alýshylar: Altron dəýiri», «Batyl júrek», «Koko qupiiasy», «Moana», «Malefisenta», «Aladdin», «Oiynshyqtar hikaiasy - 4» jáne t.b. filmder bar. Osy jobanyń arqasynda 100-den astam otandyq akterdiń daýysy «Walt Disney Pictures» daýystyq qoryna jazyldy. Qazaq tili dýbliajda túrik tilinen keiingi ekinshi túrki tili bolsa, «Walt Disney» kompaniiasynyń tarihynda 39-shy orynda.
