- «Nur Otan» partiiasynyń Ortalyq apparatynda partiia janyndaǵy «Miras» respýblikalyq keńesiniń kezekti otyrysy ótti, dep habarlaidy partiianyń baspasóz qyzmeti.
Parlament Májilisiniń depýtaty, partiianyń sailaýaldy baǵdarlamasynyń «Birlik pen kelisim» baǵyty boiynsha partiialyq kýratory Máýlen Áshimbaevtyń tóraǵalyq etýimen ótken is-sharaǵa Parlamenti Senatynyń jáne Májilisiniń depýtattary, Qazaqstan halqy Assambleiasynyń ókilderi, ǵylymi jáne shyǵarmashylyq ziialy qaýym, ýákiletti ortalyq memlekettik organdardyń ókilderi jáne «Miras» respýblikalyq keńesiniń músheleri qatysty.
Otyrystyń kún tártibinde Qazaqstan Respýblikasynyń Úkimeti janynan qurylǵan respýblikalyq onomastikalyq jáne terminologiialyq komissiialardyń aralyq qorytyndy jumystaryn talqylaý, sonymen birge «Miras» keńesiniń 2016 jylǵy jumystaryn qorytyndylaý, sondai-aq keler jylǵy jumys josparyn bekitý máselesi qaraldy.
Onomastika jáne terminologiia salasyndaǵy atqarylǵan is-sharalar týraly Mádeniet jáne sport vitse-ministri Aqtoty Raiymqulova baiandama jasap: «Táýelsizdik jyldary qol jetkizgen jetistikterdiń biri - jer-sý, obektilerniń ataýlaryna biryńǵai kózqarasty qalyptastyrý, olardyń esebin júrgizý tarihi ataýlardy qalpyna keltirý maqsatynda Onomastika komissiiasynyń jumysy jolǵa qoiylyp, osy jyldar ishinde respýblika boiynsha 1348 eldi mekenniń, 6 qala, 1305 bilim, mádeniet jáne sport mekemesiniń, 7958 kóshe men dańǵyl ataýy ózgertildi», - dep habarlady.
Sondai-aq, vitse-ministr terminologiia salasy boiynsha 2011 jylǵa deiin bekitilgen terminderdiń sany 10 myńǵa jýyq bolsa, 2015 jyly 3 myń termin, al biyl 5 myńnan asa termin bekitilgenin jetkizdi. Komissiia bekitken terminderdiń jalpy sany 18 myńdy quraidy eken. Sondai-aq, aldaǵy ýaqytta memlekettik baǵdarlama aiasynda bekitilgen terminderdiń sanyn 27 myńǵa jetkizý kózdelýde. Óz kezeginde mádeniettanýshy, pýblitsist Serik Erǵali terminologiia salasyn ǵylym retinde qalyptastyryp, damytý úshin lingvistikalyq ortalyqtar men kafedralar janyna terminologiia institýtyn qurý kerektigin aitty. Aita keteiik, partiianyń Saiasi keńes biýrosynyń sheshimine sáikes ortalyq jáne óńirlik deńgeidegi «Miras» keńesine partiianyń sailaýaldy baǵdarlamasynyń «Birlik pen kelisim» baǵytynyń oryndalýyn monitoringileý, sonymen qatar, Qazaqstan Respýblikasynda tilderdi damytý men qoldanýdyń 2011-2020 jyldarǵa arnalǵan memlekettik baǵdarlamasynyń júzege asyrylýyn partiialyq baqylaý jasaý qyzmetteri júkteldi. Osyǵan orai, «Miras» respýblikalyq keńesiniń quramy til saiasaty salasynyń kásibi sarapshylarymen, sondai-aq, birlik pen kelisimdi qamtamasyz etý, QHA ókilderimen jańartyldy.
