Qazaq tilindegi aýdiony birden mátinge ainaldyratyn qosymsha shyqty, - dep habarlaidy Tengrinews.kz.
Qosymsha TezText dep atalady, ony jasap shyǵarǵan - Galamat tech kompaniiasy, qoldaý kórsetken - AQSh-tyń Qazaqstandaǵy elshiligi. Mobildi qosymsha tegin jáne App Store men "Play Market" arqyly júktep alýǵa bolady.
Qosymshany qurastyrýshy kompaniia basshysynyń aitýynsha, TezText jýrnalister jumysyn aitarlyqtai jeńildetedi.
"TezText iOS jáne Android-qa arnalǵan sóileýdi taný júieleri men baǵdarlamalaýdyń eń úzdik jetistikterin qamtityn baǵdarlamalyq jasaqtama, ol qazaqstandyq jýrnalisterdiń kásibi qyzmetinde qazaq tilindegi aýdiojazbany mátinge kóshirip, terýge kómektesedi. Baǵdarlamalyq jasaqtama eldegi qazaqtildi jýrnalistika salasyna aitarlyqtai kómek kórsetedi jáne qazaqtildi medianaryqtyń tsifrlyq múmkindikterin keńeitedi. TezText jýrnalisterdiń qajettilikterin eskere otyryp jasalǵan mobildi qosymsha", - dedi Galamat tech basshysy Abai Serǵaziev.
Qosymsha avtorlarynyń aitýynsha, qosymshadaǵy tildik model jýrnalisterge beiimdelgen, kásibi terminderdi jaqsy tanidy. Sonymen qatar, qosymsha aitylǵan aqparatty naqty ýaqyt rejiminde jazyp, tani alady. Qosymshany jasaý úshin 10 myńnan asa material nemese 40 million sóilem qoldanylǵan.
Bolashaqta adam esimderi tolyǵyp, tynys belgilerdi qoiý máseleleri sheshilmek. Sonymen qatar, qosymshany qoldanýshylarǵa aldaǵy ýaqytta TezText qoryna jańa sózderdi engizý quqyǵy beriledi.
TezText qosymshasynyń shyǵýyna qoldaý kórsetken AQSh elshiligi ókilderiniń aitýynsha, bul qosymsha qazaq tiliniń damýyna zor úles qosady.
"AQSh elshiligi qazaq tilin damytý jolyndaǵy jobalarǵa orasan zor mán berip, únemi qoldaý kórsetedi. Bul joba da qazaq tili men onyń damýy úshin asa mańyzdy bolmaq. Tsifrlanǵan til - máńgi til", - dedi elshiliktiń ókili Qarlyǵash Jamanqulova.
Qosymsha avtorlarynyń aitýynsha, joba qazaqstandyq birqatar organǵa usynylǵan, al AQSh elshiligi birinshi bolyp qoldaý kórsetken. Qosymsha tek jýrnalisterge arnalmaǵan, ony qazaq tilindegi aýdiony mátinge ainaldyrýdy qajet etetin kez kelgen adam qoldana alady.
Eske salaiyq, biyl aqpanda Google Translate servisiniń endi qazaq tilindegi dybystaýdy aýdara alatyny habarlandy. 2014 jyly jeltoqsanda Google Translate júiesine qazaq tiline mátindik aýdarma jasaý qosylǵan.
