El zańnamasyna memlekettik tildi bilmeitinderdi azamattyqqa qabyldaýdan bas tartýdy kózdeitin túzetý ázirlendi. Bul týraly QR Premer-Ministri Álihan Smaiylovtyń Májilis depýtattarynyń saýalyna bergen jaýabynda aitylǵan, dep habarlaidy QazAqparat.
«Qazirgi ýaqytta «Qazaqstan Respýblikasynyń azamattyǵy týraly» Zańǵa memlekettik tildi, tarih pen ulttyq zańnamanyń negizderin bilmeýdi azamattyqqa qabyldaýdan jáne qalpyna keltirýden bas tartý úshin qosymsha negiz retinde kózdeitin, sondai-aq qos azamattyǵy faktileriniń aldyn alýǵa baǵyttalǵan túzetýler ázirlendi», - dep atap ótedi Úkimet basshysy.
Premer-Ministrdiń aitýynsha, atalǵan zańnamalyq túzetýler Parlament depýtattary bastama jasaǵan «Qazaqstan Respýblikasynyń keibir zańnamalyq aktilerine halyqtyń kóshi-qony salasyndaǵy zańnamany jetildirý máseleleri boiynsha ózgerister men tolyqtyrýlar engizý týraly» zań jobasy boiynsha Parlament depýtattarynyń túzetýlerine, Úkimet qorytyndysynyń jobasyna engizilgen.
Aita keteiik, Májilis depýtattarynyń saýalynda qonys aýdarýshylardyń qos azamattyǵyn tekserýge jáne quqyqtyq is-sharalar qabyldaýǵa qatysty máseleler kóterilgen bolatyn.
