Elimizde balabaqshadaǵy búldirshinderdiń 76 paiyzy memlekettik tilde tálim-tárbie alyp jatyr. Bul týraly QR Bilim jáne ǵylym ministri Ashat Aimaǵambetov málim etti, dep habarlaidy QazAqparat.
«Tildi damytý máselesi bizdiń ministrlikke berilgenine 1 jyl bolyp qaldy. Onyń bizge kóshirilgeni zańdy dep oilaimyn. Osy ýaqyt ishinde atalǵan salada aýqymdy problemanyń baryna kózimiz jetti. Iá, másele bar, biraq atqarylyp jatqan jumys ta az emes. Memlekettik tildi damytý jolynda birneshe baǵytta jumys istelinip jatyr. Atap aitqanda, aldymen qazaq tilinde bilim beretin mektepterdiń sanyn arttyrýǵa kúsh salyp jatyrmyz. Búginde elimizdegi balabaqshalardyń 76 paiyzy qazaq tilinde tálim beredi, mektepterdiń 67 paiyzy, al kolledjder men ýniversitetterdiń 64-66 paiyzy memlekettik tilde bilim berip jatyr», - dedi Ashat Aimaǵambetov «Memlekettik tildi ǵylym tiline ainaldyrý» atty dóńgelek ústelde sóilegen sózinde.
Ministrdiń aitýynsha, elimizde ata-anany balasyn qazaq tilindegi balabaqsha nemese mektepke berýge mindetteý joq.
«Sońǵy jyldary mektepte qazaq synybynda oqityn oqýshylardyń sany asa ósip jatqan joq. Sondyqtan osy baǵyttaǵy jumysqa nazar salǵan jón. Biz balalardy memlekettik tildegi bilim uiasyna yntalandyrý, nasihattaý arqyly tartýymyz kerek. Májbúrleýge bolmaidy. Iaǵni, qazaq tilinde oqýdyń qanshalyqty paidaly ekenine, onyń nátijesine kóz jetkizý arqyly dáripteýimiz kerek», - deidi ol.
Aita keteiik, búgin elordada «Memlekettik tildi ǵylym tiline ainaldyrý» máselesine arnalǵan dóńgelek ústel ótti. Atalǵan sharaǵa til janashyrlarymen qatar sala mamandary qatysty.
