UFC promoýsheninde synǵa túsip júrgen qazaq bahadúrleri budan bylai elimizdiń kók týymen oktagonǵa shyǵa almaidy, dep jazady Vesti.kz.
Jalpy atalmysh uiymda Qazaqstan atynan shyǵyp júrgen otandastarymyz saýsaqpen sanarlyq. Olar álemdegi eń myqty promoýsheninde alǵashqy qadamdaryn endi-endi jasap keledi. Kez-kelgen sportshy úshin, sonyń ishinde qazaq sarbazdary úshin halyqaralyq jarystarda kók týmen shyǵý asa mańyzdy. Sebebi ulttyq naqyshtaǵy atribýtikalarymyz sportshylarymyzǵa qosymsha kúsh beredi. Jaýapkershilikteri artady.
Alaida budan bylai álemde bolyp jatqan saiasi oqiǵalarǵa bailanysty uiymnyń prezidenti Dana Ýait liganyń barlyq sportshysyna óz elderiniń týymen oktagon ishine attap basýǵa ruqsat bermedi.
Jýyrda reseilik Petr Ian keshtiń basty aiqasyna shyǵar aldynda Resei týynsyz shyqty. Uiymdastyrýshylar kópshilik aldynda arandatýshylyq bolmasyn degen oimen Ianǵa aldyn ala eskertý jasaǵan. Nátijesinde reseilik sportshy týsyz shyqty. Sol sekildi endi qazaq MMA sheberleri de ulttyq naqyshtaǵy bas kiimdermen shyqqanymen, kók týdy segiz buryshqa alyp kire almaityn boldy.
