Búgin elordada «Aziia jazýshylarynyń I forýmy» qarsańynda jaryq kórgen «Qazaq poeziiasynyń injý-marjandary» antologiiasynyń tusaýkeseri boldy. Sharaǵa QR Parlamentiniń depýtattary, ǵalymdar, aqyn-jazýshylar, qoǵam jáne mádeniet qairatkerleri, jýrnalister qatysty, dep habarlaidy "Ult aqparat".
Antologiia Elbasy Nursultan Nazarbaevtyń «Rýhani jańǵyrý» baǵdarlamasy aiasynda Qazaqstan Prezidenti Qasym-Jomart Toqaevtyń tikelei qoldaýymen jaryqqa shyǵyp otyr.
«Memleket basshysy kórkem ádebietimizdiń damýyna árdaiym qoldaý kórsetip, barlyq múmkindikti jasap otyrǵanyn bilesizder. Osy 13 tomdyqtyń árbiriniń kirispesinde jeke-jeke toqtalyp, óziniń alǵysózin qaldyryp otyr. Júrekte býyrqanǵan ulttyq rýhty, tyń serpin beretin aqyndarymyzdyń jalyndy jyrlarynyń toptamasy qutty bolsyn deimiz. Oqyrman qaýymnyń kókeiinde «bul bastama jalǵasyn taba ma?» degen saýal týyndaǵanyn bilemiz. Prezident Qasym-Jomart Kemeluly alǵy sózderiniń birinde «aldaǵy ýaqytta osy toptama jalǵasyn taýyp, kórnekti aqyndarymyzdyń shyǵarmalaryn jaryqqa shyǵara beremiz degen senimdemin» dep atap ótken. Joǵarydaǵy suraqtyń jaýaby osy dep oilaimyn», - dedi Ulttyq kitaphanada ótken tusaýkeserde moderator bolǵan Prezidenttiń baspasóz hatshysy Berik Ýáli.
Atalǵan toptamaǵa 13 aqynnyń týyndysy engizilgen. Naqtyraq aitqanda, «Qazaq poeziiasynyń injý-marjandary» antologiiasynan Abai, Shákárim, Maǵjan Jumabaev, Qasym Amanjolov, Juban Moldaǵaliev, Jumeken Nájimedenov, Tumanbai Moldaǵaliev, Qadyr Myrza Áli, Muqaǵali Maqataev, Fariza Ońǵarsynova, Oljas Súleimenov pen Muhtar Shahanovtyń óleńderin oqi alasyzdar.
«Elbasynyń «Rýhani jańǵyrý» baǵdarlamasy aiasynda mádenietimizge, ádebietimizge qatysty igi isterdiń atqarylyp jatqanyn ózderińiz bilesizder. Sol baǵdarlamanyń aiasynda biz biyl Aziia jazýshylarynyń birinshi forýmyn ótkizeiik dep otyrmyz. Onyń kúnderi jaqyndap kele jatyr. Bul kitaptar sonyń qarsańynda jaryqqa shyqty. Forýmǵa qatysatyn qalamgerlerge osy kitaptar tartý etiledi. Memleket basshysynyń jáne odan bergi ministrlikter, memlekettik hatshy – barlyqtarynyń ádebietke degen oń kózqarasy qalyptasa bastaǵanyn, sonyń bir kórinisi ekenin erekshe atap ótkim kelip otyr. Jazýshylar odaǵyna kópten beri jasalmaǵan jóndeý jasalǵaly otyr. Qomaqty qarajat jumsalmaq. Usynǵan jobalarymyz maquldanýda. Osynyń bári - ádebietke bólinip jatqan kóńildiń aiqyn belgisindei», - dedi tusaýkeser barysynda Qazaqstan Jazýshylary odaǵynyń tóraǵasy Ulyqbek Esdáýlet.
Óz kezeginde, óleńderi atalmysh toptamaǵa engizilgen Muhtar Shahanov sóz sóilep, Qazaqstan Jazýshylar odaǵy tarapynan jańa ideialar júzege asyp jatqanyn aityp ótti.
«Eldik, shyndyq biiginde bas qosa bereiik», - dedi aqyn.
